У Столінскім раёне 11-гадовыя хлопчыкі на працягу некалькіх дзён капалі тунэль у пясочным насыпе. 1 жніўня дзеці прыйшлі на аблюбаванае месца непадалёк ад сваёй вёскі і працягнулі небяспечны занятак. Але раптам грунт абрынуўся і засыпаў аднаго з іх. Медыкамі праводзіліся рэанімацыйныя дзеянні, аднак выратаваць дзіця не ўдалося.
У Касцюковіцкім раёне на мінулым тыдні трагедыі ўдалося пазбегнуць, але жаданне 10-гадовага хлопчыка ціхенька развесці вогнішча ў бабуліным хляве скончылася пажарам, у выніку якога пашкоджана пабудова і суседскі аўтамабіль.
Большасць падобных трагедый і надзвычайных сітуацый часцей за ўсё здараецца падчас летніх канікул, калі ў дзяцей шмат вольнага часу. Не пускайце сыноў і дочак да незавершаных і старых будынкаў, кар’ераў. Абвальванне грунту адбываецца маментальна, магчымасці выбрацца з-пад завалу практычна няма. Маленькіх не пакідайце без нагляду, трымайце на кантролі месцы знаходжання старэйшых дзяцей.
Існуе меркаванне, што засцерагчы дзіцяці ад траўм і здарэнняў можна, забараніўшы яму ўсе патэнцыяльна небяспечныя дзеянні. Але гэта не так. Задача дарослых – не змагацца з фізіялагічна апраўданай актыўнасцю, а адцягнуць увагу дзяцей ад рызыкоўных свавольстваў, прапанаваўшы не менш цікавую альтэрнатыву. Расказвайце дзецям аб элементарных правілах бяспекі. Захоўвайце запалкі ў недаступных месцах, не дазваляйце самастойна карыстацца газавымі і электрычнымі прыборамі.
Усё лета ўшацкія выратавальнікі праводзяць прафілактычную акцыю “Канікулы без дыму і агню”. Падчас сустрэч з дзецьмі ў лагерах у займальнай форме нагадваюць правілы бяспекі.
Ганна ЛЯШКОВА,
інспектар сектара прапаганды РАНС.
