У новым навучальным годзе беларускіх школьнікаў чакае нямала новаўвядзенняў. Пра некаторыя з іх падчас нядаўняй “прамой лініі” мы пагутарылі з начальнікам аддзела па адукацыі Ушацкага райвыканкама Л.В.ДАВЫДАВАЙ. Са сваімі пытаннямі да Людмілы Васільеўны звярнуліся і нашы чытачы.
– Навучальны год пачнецца сёлета пазней звычайнага?
– Так. Паколькі Дзень ведаў прыпадае на нядзелю, першая чвэрць афіцыйна пачнецца з 2 верасня. Канкрэтны час лінеек у школах паведамім крыху пазней.
– Якія новыя прадметы з’явяцца?
– Для першакласнікаў гэта “Уводзіны ў школьнае жыццё”. Праграма, якая ставіць на мэце адаптацыю дзяцей да школьнага працэсу, разлічана на 60 гадзін на працягу першых 20 вучэбных дзён. Заняткі будуць праводзіцца з выкарыстаннем гульняў, развіваючых практыкаванняў.
Замест двух падручнікаў па гісторыі атрымаюць толькі адзін навучэнцы 10 класаў. Для іх уводзіцца новая дысцыпліна “Гісторыя Беларусі ў кантэксце сусветнай гісторыі”.
– На слыху – з’яўленне новых дзённікаў…
– Так, дызайн і змест на 2024-2025 навучальны год зменены. Прычым, датычыцца гэта дзённікаў і для 3-4, і для 5-11 класаў. Пры пакупцы абавязкова звяртайце ўвагу на дату выдання – ранейшыя ўзоры выкарыстоўваць нельга.
– Ці мяняецца штосьці ў школьнай форме?
– Так. Ва Ушацкай школе, дзе ў ліку абавязковых дагэтуль былі чорны ніз і бардовая камізэлька са значком, цяпер будзе і белы верх з бардовым гальштукам. У Глыбачанскай СШ, дзе былі гальштук з эмблемай школы і цёмна-сінія жылет ці жакет, дабавіцца ніз такога ж колеру. У Ільюшынскай, Арэхаўскай і Вялікадолецкай школах цяперашні камплект адзення дзелавога стылю – гэта бардовы ці сіні жылет са значком, чорны ніз і класічныя мадэлі абутку няяркіх таноў. Нагадаю: такая “ідэнтэфікацыя” – абавязковая, таму лепш паклапаціцца пра яе загадзя. На сайтах усіх устаноў адукацыі размешчана карысная інфармацыя па тэме – з указаннем айчынных вытворцаў, каталогамі адзення.
– У сельскіх школах з’явіліся металічныя скрыні з ячэйкамі на ўваходзе. Навошта яны?
– Будуць такія і ва Ушачах – зараз праводзіцца закупка. Неабходны ж такія элементы для стварэння ў школах асяроддзя без мабільных тэлефонаў. Вучні будуць абавязаны на час заняткаў пакідаць сродкі сувязі ў ячэйцы пад замком. Выкананне такога патрабавання, уведзенага на ўзроўні Міністэрства адукацыі краіны, будзе кантралявацца.
Разумею, што абавязкова знойдуцца праціўнікі такога новаўвядзення. Для іх скажу, што бескантрольнае выкарыстанне мабільных прылад у школах адназначна шкодзіць. Дзеці займаюцца на ўроках абы-чым, а на перапынках замест таго каб адпачыць, сядзяць у тэлефонах.
– Дачка па мэтавым накіраванні ад аддзела па адукацыі вучыцца ў ПДУ. Ці магчыма пасля яго заканчэння па сямейных абставінах (збіраецца замуж) не праходзіць адпрацоўку ва Ушацкім раёне – застацца ў Наваполацку?
– Адкажу адмоўна. Не адпрацоўваць тэрмін мэтавага размеркавання можна толькі ў тым выпадку, калі ў выпускніка ўзніклі медыцынскія супрацьпаказанні да работы па атрыманай спецыяльнасці.
Дарэчы, сёлета ў сістэму адукацыі Ушацкага раёна павінна прыйсці 12 маладых спецыялістаў, 4 з якіх – таксама мэтавікі.
Падрыхтавала Кацярына КАВАЛЕЎСКАЯ.
