“Вы мяне ведаеце?” – падчас чарговага візіту ва Ушачы і сустрэчы з адным працоўным калектывам спытаў Сяргей Мікалаевіч Мялешкін і адразу пачуў станоўчы адказ. У раёне член Савета Рэспублікі Нацыянальнага сходу Рэспублікі Беларусь, дэпутат Віцебскага абласнога Савета дэпутатаў па Ушацкай выбарчай акрузе № 51 бывае часта і кожны свой візіт плануе не дзеля галачкі, а каб ён атрымаўся плённым і канструктыўным.
Падчас прыёму грамадзян да дэпутата на гэты раз звярнуўся адзін чалавек. Пытанне ж датычылася ведамства, якое ўзначальвае Сяргей Мікалаевіч. Малады ўшачанін жадае стаць выратавальнікам і пры гэтым паралельна атрымліваць вышэйшую адукацыю. Пасля абмеркавання пэўных нюансаў сітуацыі С.М.Мялешкін паабяцаў дапамагчы станоўча вырашыць пытанне, тым больш кадры МНС патрэбны.
Задаць хвалюючыя пытанні сенатару мелі магчымасць і работнікі ўчастка “Ушачы” філіяла АТП №6 г.Наваполацка – чарговая сустрэча з ушачанамі на гэты раз была арганізавана ў названым працоўным калектыве. Агучаныя праблемы без перабольшвання можна назваць грамадскімі. Адна з іх – зношанасць аўтобуснага парка, з-за чаго часта здараюцца паломкі, адпаведна збоі ў руху. “Хочацца не толькі каб нам было добра працаваць, без аўралаў, а і ўсім ушачанам з камфортам і без замінак ездзіць па дарогах”, – адзначалі працаўнікі ўчастка. Нядаўна дзякуючы кіраўніцтву раёна і АТП №6 аўтапарк папоўніўся новым МАЗам і яшчэ адной адзінкай з прабегам, аднак замене падлягае большая частка аўтобусаў. Агучылі ў калектыве і вялікае жаданне акультурыць аўтастанцыю райцэнтра – як сам будынак, так і прылеглую тэрыторыю, якая ўсім запамінаецца шматлікімі ямкамі ў асфальтавым пакрыцці. Наш дэпутат узяў усе ўзнятыя пытанні на карандаш і запэўніў, што прыкладзе намаганні для іх вырашэння. А карыстаючыся выпадкам, нагадаў членам калектыву аб выкананні правіл пажарнай бяспекі, неабходнасці быць асцярожнымі на вадаёмах.
Падчас візіту ў раён Сяргей Мікалаевіч таксама азнаёміўся з асартыментам і коштам на школьныя тавары ва ўнівермагу (на здымку). Цэны там прымальныя, тым больш пастаянна праходзяць дні скідак і акцыі, але асартымент мог бы быць і большым. “Неабгрунтаванага росту цэн і пустых паліц не павінна быць. Тым больш напярэдадні новага навучальнага года. Гэтую тэму трымаюць на кантролі члены Савета Рэспублікі”, – падкрэсліў С.М.Мялешкін. Дарэчы, на наступным тыдні старшыня Савета Рэспублікі Н.І.Качанава правядзе нараду з кіраўніцтвам Міністэрства антыманапольнага рэгулявання і гандлю, канцэрна “Беллегпрам”, вядучых гандлёвых сетак, прысвечаную асартыменту і цэнам на школьныя
тавары.
Вольга КАМАРКОВА.
