У мінулую пятніцу ва ўсіх школах раёна прайшлі выпускныя вечары. 63 адзінаццацікласнікі накіраваліся ў самастойнае жыццё. “Ляціце высока. Мы вас адпускаем!”, – такімі словамі заканчвалася апошняя “лінейка” ва Ушацкай школе, а вучні імкнуліся вышэй падкінуць галубоў.
У атэстаце – 9,6, 100 – па ЦЭ і нават накіраванне на паступленне ў ВНУ. Усё гэта неспадзяваныя падзеі выпускнога вечара. Але, зразумела, што былі і нязменныя традыцыі развітання са школай: вальс, пасадка дрэўцаў, наказ на самастойнае жыццё настаўнікаў і бацькоў.
Гэтыя дзве ролі сумяшчалі 14 чэрвеня Святлана Міхайлаўна Ільюшэнка – першая настаўніца і маці выпускніка Дзмітрыя і Людміла Васільеўна Трафімава, якая выкладала ў паралелі і ў сына Паўла рускую мову. Хоць і не дазваляла карыстацца шпаргалкамі сваім вучням настаўнік інфарматыкі і класны кіраўнік 11 “А” Рыта Анатольеўна Бутоўская, аднак для сябе на гэты раз падрыхтавала – хвалявалася не менш за бацькоў. Ды па сутнасці яны і Г.С.Данілёнак і сталі другімі мамамі – сем год разам шэсць дзён на тыдні – мабыць, нават болей, чым праводзяць з дзецьмі родныя. Для Галіны Сяргееўны гэта першы выпуск ва Ушацкай школе і чацвёрты з улікам працы ў Жарскай і Плінскай. Для Рыты Анатольеўны – таксама чацвёрты, але другі поўны – калі вядзеш дзяцей з пятага па адзінаццаты.
Ну а для дырэктара Алены Уладзіміраўны Ворсы – першы. Зразумела, што ўручаючы атэстаты, яна з гонарам падкрэслівала дасягненні дзяцей. 100 балаў набрала на цэнтралізаваным экзамене па рускай мове Аляўціна Пракудзіна і 98 – па гісторыі Беларусі. Выдатніца вучобы мае атэстат 9,6 бала, як і Сафія Каўрэцкая, Вераніка Гракава, зусім нямногім менш (9,2) – у Лізаветы Пахолак і Івана Чумакова. Многа выпускнікоў атрымалі Пахвальныя лісты аддзела па адукацыі і школы за ўзорнае вывучэнне асобных прадметаў, а Марыя Харак нават накіраванне для паступлення ў Акадэмію МУС. Сімвалічна, што ўручала яго, як і Лісты падзякі актывістам лідар райкама БРСМ Рыта Хрыпель – Марыя з часу ўступлення ў рады арганізацыі была нязменнай ўдзельніцай абсалютна ўсіх яе спраў.
У тэатральнай студыі ў Віцебску вучылася Аліна Пясецкая, аднак гэта хобі дзяўчыны, якая на паглыбленым узроўні вывучала хімію і біялогію, паколькі мяркуе стаць медыкам. Вельмі старанна ўтрамбоўваў дэкаратыўны куст яе 11”Б”. “Мы ж аграрыі, ведаем, як гэта робіцца”, – падкрэсліў Коля Баравікоў, паліваючы расліну. Так, у класах былі профілі, акрамя прыгаданага – грамадазнаўства і замежная мова, агранамія. А паколькі згодна схільнасцяў і жаданняў вучняў падзялілі толькі ў дзясятым – то многія лічаць адзін аднаго аднакласнікамі. Таму і сваю развітальную праграму рыхтавалі разам – а атрымалася яна музычнай. Для кожнага прадметніка, класных кіраўнікоў і бацькоў прагучалі персанальныя песні, а ў напісаных тэкстах угадваліся і персанажы, і гісторыі са школьнага жыцця. Нават сцэнка пра фізіку была падобная на міні-мюзікл. І гэта невыпадкова: большая палова з 40 выпускнікоў скончыла Ушацкую ДШМ. І нават калі ішлі на ўскладанне кветак да помніка воінам і партызанам у скверы, зацягнулі страявую.
Не адсталі ад іх і галасістыя бацькі. А акрамя песні, якая скончылася шчырымі абдымкамі са сваімі дзецьмі, прадбачліва запісалі відэа. Яно вельмі выручыла, калі гаварыць Вользе Уладзіміраўне Чумаковай перашкаджалі слёзы.
Хаця гумару было не меней. “Тэст на любоў”, мяркую, кожны ўзяў на ўзбраенне. Дзеці запісалі на відэа нечаканыя тэлефанаванні татам і мамам з аднолькавай фразай: “Я цябе люблю”. А адказы гучалі ад прадказальных “Я цябе таксама” да “За што гэта, цікава?”, “Кажы ўжо, колькі грошай трэба”, “Нешта здарылася, ты дзе?”. Смяяліся ў зале ўсе, паколькі не пастановачнымі, жыццёвымі былі адказы няведаючых пра запіс бацькоў. Відаць, не надта часта ў паўсядзённым жыцці кажуць гэта дзеці, як і “дзякуй”. Але ж выпускнікі – ужо дарослыя, крышачку па-іншаму зірнулі на школьныя гады і слоў удзячнасці ў гэты вечар не шкадавалі.
Вольга КАРАЛЕНКА.
