За прайшоўшыя выхадныя ў Віцебскай вобласці патанула 2 чалавекі. Адзін з трагічных выпадкаў адбыўся ва Ушацкім раёне.
У нядзелю вечарам выратавальнікам паступіла паведамленне аб патануўшым чалавеку паблізу пляжа санаторыя «Лясныя азёры» на возеры Должына. Мінчанін 1962 года нараджэння, які адпачываў у здраўніцы, адправіўся лавіць рыбу. А праз некаторы час яго знайшлі на вадаёме без прыкмет жыцця.
У Лепелі на рацэ Ула ў трох метрах ад берагавой лініі было знойдзена цела мужчыны. У абодвух выпадках высвятляюцца абставіны здарэнняў.
З кожным летнім днём тых, хто ідзе на дно, становіцца ўсё больш. На мінулым тыдні ў Жлобінскім раёне група падлеткаў купалася на вадаёме, дваім вярнуцца на бераг не ўдалося…
Практычна штодня ўсе зацікаўленыя службы прафілактыкі Ушацкага раёна праводзяць рэйды па вадаёмах. Работнікі райаддзелаў па надзвычайных сітуацыях і ўнутраных спраў, райбальніцы нагадваюць адпачываючым на берагах рэк і азёр аб правілах паводзін на вадзе, аказанні першай меддапамогі, прыводзяць прыклады трагічных выпадкаў.
Некалькі слоў аб правілах, якія дапамогуць пазбегнуць бяды. Спрыяльныя ўмовы для купання – бязветранае надвор’е, тэмпература паветра 25 і больш градусаў, а вады – не ніжэй 18.
Нельга плаваць у стане ап’янення, ныраць у незнаёмых месцах. Калі вас захапіла цячэннем, трэба плыць па ім, паступова пад вуглом набліжаючыся да берага. Калі трапілі ў вір, набярыце больш паветра ў лёгкія, пагрузіцеся ў ваду і, зрабіўшы моцны рывок убок, усплывайце. Надзіманыя матрацы і камеры можа аднесці далёка ад берага. Беражыце сябе, а ў выпадку надзвычайнай сітуацыі тэлефануйце 101 ці 112.
У гэтым сезоне на вадаёмах Віцебшчыны патанулі 11 чалавек, гэта былі грамадзяне працаздольнага і пенсійнага ўзросту, 10 з іх па папярэдняй інфармацыі знаходзіліся ў стане алкагольнага ап’янення.
Вольга КАМАРКОВА.
