Хоць аграсядзіба “Бераг мары” знаходзіцца ля возера Трошча, аднак яе адкрыццю паспрыяла… Заходняя Дзвіна. Справа ў тым, што калі на рацэ пачалі ўзводзіць плаціну Полацкай ГЭС, прараба адной са сталічных кампаній Генадзя Іванавіча Лапіцкага адправілі ў камандзіроўку на гэтае будаўніцтва. Каля чатырох год ён працаваў на маштабным аб’екце і за час паездак спаўна ацаніў прыгажосць азёрнага Прыдзвіння. І хоць у іх з жонкай ужо была дача пад Мінскам, абое загарэліся ідэяй пасяліцца ў экалагічна чыстай глыбінцы. Пад гэты запыт ідэальна падышла запаветная вёска Белае, што стаіць на беразе вадаёма, які лічыцца адным з самых глыбокіх і празрыстых у Беларусі.
Участак яны набылі шэсць год таму і актыўна ўзяліся за будаўніцтва. А паколькі і на заслужаным адпачынку не збіраліся сядзець без справы, вырашылі паспрабаваць сябе ў аграэкатурыстычнай сферы. Зруб для дома заказалі ў мосарскага прадпрымальніка Сяргея Мягеля, які, дарэчы, вельмі якасна выканаў работу (атрымаць такую ацэнку ад прафесіянала – удвая ганарова). Гасцявы будынак вырабіў Ушацкі лясгас, а прыгожую драўляную альтанку, што “маскіруе” водазаборную свідравіну, – прыватнае прадпрыемства Генадзя Малашчанкі. Такім чынам, да ўладкавання “Берага мары” прыклалі руку некалькі ўшацкіх майстроў. А ўсю аддзелку ў дамах, іншыя будаўнічыя аперацыі выканаў сам гаспадар, які проста не ўмее сядзець, склаўшы рукі. Тое ж можна сказаць і пра яго жонку Таццяну Аляксандраўну. Абое ведаюць толк не толькі ў будаўніцтве, афармленні дакументацыі, а і ў зносінах з людзьмі, што немалаважна ў новай справе.
Першых гасцей гаспадары прынялі летась, але больш шырокую дзейнасць разгарнулі з гэтай вясны. “Нядаўна прыязджала сям’я з дзецьмі, потым – кампанія з двума сабачкам. Гасцявала маладая пара з Ушач, а ў гэтыя выхадныя “хавалася ад сталічнай мітусні” сям’я медыкаў. Адны з гасцей параўноўвалі “Бераг мары” з сядзібай на Глыбоччыне, дзе раней адпачывалі: у нас ім асабліва спадабалася, што ўсе будынкі абсалютна новыя, чысценькія, камфортныя. Ну а ад возера ў захапленні абсалютна ўсе. Вядома ж, ёсць тут лазня, лодка, арэлі, батуты – тое, што патрэбна для змястоўнага баўлення часу. Пры гэтым цэннік мы зрабілі прымальны. Шмат заявак паступіла на ліпень і жнівень, у тым ліку ад расіян, якія даведаліся пра нас з рэсурса “belkraj.by”, – расказалі нам Таццяна і Генадзь.
Штодня яны старанна працуюць над удасканаленнем садзібы. У першы сезон заклалі тут пладовы сад, які пастаянна дапаўняюць. Садзяць агарод, завялі курачак – так што могуць прапанаваць гасцям свойскія прадукты. Сёлета ўчастак аздобілі 56 кусцікаў самшыту – гэтую расліну гаспадыня разводзіць сама. А Генадзь Іванавіч у дзень нашага візіту падсыпаў гравіем дарожкі.
Канечне, тым, хто ўзяўся за падобную справу, трэба быць гатовым да пастаянных клопатаў, але для Лапіцкіх гэта – звыклы стыль жыцця. А калі твой “Бераг мары” прыносіць радасць і іншым людзям – дык чаго можна яшчэ жадаць?..
Наталля БАГДАНОВІЧ.
