У Гродне маштабна прайшоў ХІV Фестываль нацыянальных культур, і вельмі прыемна, што яго праграма не абышлася без нашага ўдзелу – Ушаччыну прадставіў народны клуб нацыянальных культур “Дружба”.
Існуе аб’яднанне ўжо 23 гады, але ж я ўзначаліла яго нядаўна, і на гродзенскі фестываль адправілася ўпершыню – і тым больш яркімі аказаліся мае ўражанні. Лейтматывам свята стала тэма вялікай сям’і народаў, што жывуць у Беларусі. Пачалося ж яно з яскравага тэатралізаванага шэсця: калоны ўсіх дыяспар-удзельніц прайшлі па цэнтральнай вуліцы, абапал якой нас віталі гараджане. Усяго ж, дарэчы, гасцямі свята сталі каля 200 тысяч чалавек!
На традыцыйных нацыянальных падворках можна было пазнаёміцца з касцюмамі, культурай і кухняй розных этнасаў. Дастойна прадставіць нашу пляцоўку дапамаглі ўдзельнікі і сябры клуба.
Айгуль Смык аформіла выставу дэкаратыўна-прыкладной творчасці, дзе акцэнт быў зроблены на казахскі каларыт – менавіта з гэтай рэспублікі ў свой час пераехала ў Беларусь яе сям’я. Святлана Вацьковіч з Кубліч прапанавала ўкраінскія вышыўкі. Ліза Кемстач з Ільюшына перадала свае карціны, а яе мама Ірына Уладзіміраўна – стравы таджыкскай кухні.
Старажылам нашага клуба з’яўляецца Вольга Візгалава – у гэты раз яна прэзентавала элементы башкірскага меню: усім спадабаўся “Чак-чак” – дробныя мучныя шарыкі, якія падаюць на вясельны стол: чым больш элементаў у страве, тым багацейшымі будуць маладыя. Ацанілі госці піражкі са шчаўем, ляпёшкі з гарбузом – водгукі тых, хто завітаў на ўшацкі падворак, былі толькі станоўчыя!
Не абышлося без нашага ўдзелу і ў канцэртнай праграме: знакамітую “Чэрвону руту” выканала Таццяна Нарывончык, якая з’явілася на свет ва Украіне.
Цікавым момантам стаў удзел нашай дэлегацыі ў здымках тэлеперадачы “Паедзем, паядзім”, эфір якой запланаваны на верасень.
У час свята ўсе мы яшчэ больш упэўніліся: як гэта выдатна, што ў Беларусі аднолькава прыхільна ставяцца да людзей усіх нацыянальнасцяў.
Анастасія КАРЫМАВА,
кіраўнік клуба “Дружба”.
