Прыём грамадзян і прадстаўнікоў юрыдычных асоб, які ў панядзелак ва Ушачах праводзіў дэпутат Палаты прадстаўнікоў Нацыянальнага сходу Рэспублікі Беларусь па Полацкай сельскай выбарчай акрузе №28 Аляксандр Стома, вялікага ажыятажу не выклікаў. Магчымасцю задаць свае хвалюючыя пытанні скарыстаўся толькі адзін чалавек, які прыйшоў з пытаннямі прыватнага характару.
Дарэчы, гэта быў першы прыём грамадзян ва Ушачах пасля абрання Аляксандра Мікалаевіча дэпутатам ніжняй палаты парламента, дзе ён з’яўляецца членам Пастаяннай камісіі па бюджэце і фінансах. У Полацкую сельскую выбарчую акругу акрамя Ушацкага раёна ўваходзяць Верхнядзвінскі, Расонскі, Шумілінскі і частка Полацкага з колькасцю выбаршчыкаў больш за 59 тысяч.
Як адзначыў А.М.Стома, адсутнасць вялікай колькасці заяўнікоў у час прыёму сведчыць аб тым, што на Ушаччыне работа з насельніцтвам, зваротамі грамадзян добра арганізавана, многія праблемныя пытанні вырашаюцца на мясцовым узроўні. Практыка прыёмаў, сустрэч з насельніцтва будзе працягвацца.
Падчас рабочай паездкі ў наш рэгіён дэпутат таксама наведаў цэнтральную раённую бальніцу.
Вольга КАМАРКОВА.
