“У вас цудоўна!” Гэтыя словы не раз прасілі перакладчыка перадаць гаспадарам прадстаўнікі Кітайскай Народнай Рэспублікі падчас наведвання Ушаччыны на гэтым тыдні. Праграма візіту была прадуманай і насычанай, госці паспелі наведаць шмат аб’ектаў і абмеркаваць перспектывы міжрэгіянальнага супрацоўніцтва.
Беларусь і Кітай звязваюць даўнія сяброўскія адносіны. Не першы год наладжвае сувязі з жыхарамі Паднябеснай і Ушацкі раён. Летась прадстаўнікі дзвюх правінцый Кітая ўжо прыязджалі да нас для вывучэння патэнцыялу рэгіёну з мэтай эканамічнага супрацоўніцтва, а пасля візіту нашай дэлегацыі быў падпісаны мемарандум аб супрацоўніцтве паміж Ушацкім раёнам і горадам Тайань правінцыі Шаньдун. Сёлета заснавальнік адкрытага акцыянернага таварыства “Белчайна коннект” Яна Вонг, якая ўжо добра знаёма з Ушаччынай, арганізавала яшчэ адну дзелавую вандроўку, і ў складзе дэлегацыі Шаньдунскай правінцыі аказаліся прадстаўнікі бізнесу, кіраўнікі арганізацый розных сфер дзейнасці.
Пачаўся ж візіт замежнай дэлегацыі з наведвання “Юнацтва-Ушачы”, дзе акрамя экскурсіі па комплексе і будучым інтэрнаце для спартсменаў была наладжана выстава выпускаемай у раёне прадукцыі. Свае ўзоры выставілі лясгас, ТАА “Лес”, Ушацкі філіял аблспажыўтаварыства, “Твестуба-Про”.
Кітайскія бізнесмены цікавіліся літаральна ўсім і задавалі шмат пытанняў. Убачыўшы кардонныя гільзы, паведамілі, што ў Кітаі выпускаецца дастаткова падобнай прадукцыі, а вось сярод узораў лясгаса нечакана вылучылі бярозавік. Зняўшы пробу, пыталіся пра яго нарыхтоўку, магчымыя аб’ёмы, тэрміны прыдатнасці і захоўванне. Дарэчы, азнаямленне з прамысловасцю не абмежавалася толькі выставай. Бачны быў інтарэс гасцей падчас візіту ў цэх дрэваапрацоўкі лясгаса: цікавіліся лагістыкай, фатаграфавалі, мацалі ў руках розныя віды пілавання і прасілі даць кавалачак ўзору з сабой. Дарэчы, беларускі 2 сорт драўніны ў Кітаі адпавядае першаму. А ўбачыўшы, што на іх погляд добрую сыравіну прапускаюць праз станок і робяць дровы, нават прыйшлі ў роспач, зазначыўшы, што гэта раскоша. Кожны з прадстаўнікоў дэлегацыі сфатаграфаваў макет зруба дома і цікавіўся коштам, адразу пераводзячы ўсё ў юані.
Сяргей Садоўскі, старшыня райвыканкама:
“Наша сустрэча будзе мець працяг, паколькі ў кітайскага боку ёсць шчырая зацікаўленасць і перспектыўнае бачанне ва ўкладанне інвестыцый на тэрыторыі Беларусі”.
У цэху безалкагольных напіткаў Ушацкага філіяла падчас візіту гасцей з КНР па лініі разліву “беглі” бутэлькі з ліманадам “Лімон-лайм”. Спачатку працэс павышанага інтарэсу не выклікаў – такія вытворчасці ёсць у Кітаі, аднак пасля дэгустацыі “пасыпаліся” пытанні і нават прапановы на будучае. “Ваша вада і напіткі намнога смачнейшыя, а вось наша лінія больш сучасная. Трэба кааперавацца!” – зазначаў кітайскі бок. Так, калі лінія Ушацкага філіяла здольна выпусціць да трох тысяч бутэлек напіткаў за гадзіну, то тая, якую выкарыстоўваюць у Кітаі – у пяць разоў больш.
У параўнанні з прыгаданымі аб’ектамі, у санаторыі “Лясныя азёры” затрымаліся больш за ўсё. Гасцей азнаёмілі з работай лячэбнага корпуса і спа-цэнтра, умовамі размяшчэння гасцей, а таксама адметнай “фішкай” – крыніцамі. Не маглі не палюбавацца краявідамі возера Должыца, нават без перакладу па эмоцыях гасцей было зразумела, што ім падабаецца. Што і казаць, у асаблівай рэкламе наша здраўніца не мае патрэбы: у цяперашні час пуцёўкі ўжо раскуплены да пачатку кастрычніка. Не менш маляўнічыя ўчасткі на берагах азёр для будаўніцтва аб’ектаў турыстычнай дзейнасці былі прапанаваны кітайскаму боку падчас пасяджэння ў райвыканкаме, дзе перайшлі да канструктыўнага дыялогу. Так, напрыклад, маецца распрацаваны маштабны праект, які прадугледжвае стварэнне аб’ектаў адразу некалькіх накірункаў – турыстычнага і сельскагаспадарчага комплексаў, паляўнічай гаспадаркі з базай адпачынку. І калі гэта пакуль на паперы, то “Сарочына-Агра” ўжо працуе і шукае інвестараў для рэканструкцыі памяшканняў і пашырэння вытворчасці. Даволі перспектыўна выглядаюць праекты, звязаныя са здабычай торфу і сапрапелі. Залежы першага на Ушаччыне складаюць 29,5 мільёна тон, а запасы другога – 175. Дарэчы, каб мець уяўленне аб такой прапанове, для кітайскай дэлегацыі была спецыяльна наладжана экскурсія ў суседні Докшыцкі раён на філіял УП “Віцебскторф” – прадпрыемства першым у Беларусі стала прадаваць торф на кітайскі рынак. У сваю чаргу кітайцы таксама агучвалі некаторыя свае прапановы, да прыкладу, наладзіць вырошчванне часнаку.
З цікавасцю кітайскія госці знаёміліся з экспазіцыяй музея народнай славы імя У.Е.Лабанка, а на мемарыяльным комплексе “Прарыў” усклалі кветкі да брацкай магілы і разам з кіраўніцтвам раёна ўшанавалі памяць загінуўшых хвілінай маўчання.
Якім будзе працяг візіту кітайскай дэлегацыі – пакажа час. Раён зацікаўлены ў інвестыцыях, новых вытворчасцях і рынках збыту прадукцыі, кітайскі бок – таксама. А паколькі размова ідзе пра эканоміку, усяму папярэднічаюць дакладныя разлікі, а падлічвае кітайскі бок усё вельмі грунтоўна. Ну а пакуль падпісаны пратакол аб намерах рэалізацыі супрацоўніцтва на 2024-2030 гады ў сферы турызму паміж сектарам спорту і турызму Ушацкага райвыканкама і Шаньсі (Яньтай) кампаніяй інвестыцыйнага развіцця з абмежаванай адказнасцю.
Вольга КАМАРКОВА.
