Тэматычны тыдзень у рамках інфармацыйна-патрыятычнага праекта “Шляхі вызвалення” прайшоў ў Глыбачанскай сярэдняй школе.
Адкрыла яго аднайменная кніжная выстава, арганізаваная бібліятэкарам З.Я.Корабавай. Нашай увазе было прадстаўлена выданне “Памятныя месцы Беларусі”. Уразіў веліччу і смуткам мемарыяльны комплекс “Памяці спаленых вёсак” у Борках, у якой карнікі расстралялі і зажыва спалілі 1800 жыхароў. Гонар за Радзіму выклікалі ілюстрацыі карцін У.Сухаверхава “За родную Беларусь”, А.Шыбнёва “Партызаны вядуць палонных немцаў”, Я.Ціхановіча “Партызаны ў разведцы”. З болем у сэрцах разглядалі работы М.Савіцкага ”Спяваючыя камуністы”, “Вязень”, на якіх адлюстраваны пакуты зняволеных у канцэнтрацыйным лагеры “Асвенцым”. А палатно “Партызанская мадонна” ўразіла як сімвал непераможнасці жыцця – мацярынства.
Настаўнік беларускай мовы і літаратуры Г.В.Казлова арганізавала конкурс чытальнікаў вершаў. Пранікнёна, з любоўю да Радзімы дзеці чыталі творы знакамітых паэтаў пра герояў вайны. Пераможцамі сталі дзевяцікласніцы Дар’я Краснова, Анастасія Сяліцкая і Аляксандра Сіскевіч, а таксама васьмікласнікі Ксенія Церашкавец, Сяргей Хударожкаў і Ангеліна Быкава, якія выступілі з баладамі.
Нямала ўдзельнікаў сабраў конкурс малюнкаў “Рэха вайны і памяць сэрца”. Юныя мастакі адлюстравалі свае адносіны да гераічных гістарычных падзей, светлага Дня Перамогі. Дыпломы пераможцаў атрымалі пяцікласніца Сафія Шпакава, сямікласніца Кіра Чувахова і васьмікласніца Ксенія Церашкавец.
Тэматычны тыдзень дазволіў нам, навучэнцам, яшчэ раз асэнсаваць, што нельга забываць пра страшную катастрофу чалавецтва – Вялікую Айчынную вайну. Мы павінны памятаць пра пакаленне нашых дзядоў і прадзедаў, якія перажылі жорсткія выпрабаванні і здабылі для нас Перамогу. Мы абавязаны шанаваць і берагчы мір у нашай краіне!
Ягор Кучаронак,
вучань 8 класа Глыбачанскай СШ.
