Трагічная статыстыка першага летняга дня: на Віцебшчыне патанула тры чалавекі, а ўсяго за мінулы тыдзень вада забрала жыцці шасцярых жыхароў вобласці.
Усе тры гібелі 1 чэрвеня адбыліся на рэках. У першым выпадку не разлічыў сілы, купаючыся на Дняпры, 57-гадовы жыхар Аршанскага раёна. Яшчэ аднаго мужчыну 1971 года нараджэння відавочцы ўбачылі і дасталі з ракі Тураўлянка паблізу вёскі Емяльянікі на Полаччыне. А ў Бешанковіцкім раёне 30-гадовы мужчына святкаваў дзень нараджэння сябра, а потым з таварышам вырашыў пакупацца ў рацэ Уле: скокнуў у ваду з берага і ўжо не вынырнуў. Яго цела знайшлі толькі на наступны дзень.
Будзьце асцярожнымі падчас адпачынку ля вады. Тонуць нават тыя, хто ўпэўнены ў сваіх сілах. Не купайцеся і не нырайце ў незнаёмых месцах і тым больш не бярыце з сабой на пляж алкаголь. У большасці выпадкаў менавіта ўжыванне спіртнога з’яўляецца галоўнай прадпасылкай гібелі людзей на вадзе. Да таго ж, спякота ў спалучэнні з халоднай вадой могуць справакаваць збой у арганізме нават моцнага чалавека.
Асобна хочацца нагадаць пра бяспеку дзяцей. “На мінулым тыдні праходзіла каля рэчкі па вуліцы П.Броўкі і ўбачыла ў вадзе групу малых, якія былі адны. Яны сваволілі, жартам клікалі на дапамогу, ныралі. Калі зрабіла ім заўвагу наконт бяспечных паводзін, у адказ пачула: “Нам бацькі ўсё дазволілі!” – расказвае інспектар сектара прапаганды райаддзела па надзвычайных сітуацыях Ганна Ляшкова. – Між тым, прыгаданае месца не ўваходзіць у пералік прызначаных для
купання”.
З дзецьмі праведзены прафілактычныя размовы. Аднак не факт, што гарэзы спужаліся настаўлення чалавека ў форме і засвоілі, што адным нельга адпраўляцца на вадаём. Таму хочацца звярнуцца да бацькоў: не выпрабоўвайце лёс, не адпускайце дзяцей без нагляду да вады, сачыце, чым заняты вашы нашчадкі ў вольны час. Беражыце сябе і сваіх блізкіх, не дапускайце неабдуманых учынкаў!
Вольга КАМАРКОВА.
