Словы “Час выбраў нас!”, што сталі дэвізам VII Усебеларускага народнага сходу, не раз гучалі ў гэту сераду і з вуснаў моладзі раёна. На Ушаччыне дадзены старт рэспубліканскаму праекту “Маладзёжны сход”, ініцыятарам якога выступілі БРСМ і Маладзёжны савет (парламент) пры Нацыянальным сходзе Рэспублікі Беларусь.
Як адзначыла на адкрыцці мерапрыемства першы сакратар райкама БРСМ Рыта Хрыпель, галоўная ідэя праекта – у арганізацыі пляцовак для камунікацыі моладзі. І хаця тэму на старце абмяркоўвалі сур’ёзную – нядаўна праведзены УНС, зацвярджэнне па яго выніках Канцэпцыі нацыянальнай бяспекі, Ваеннай дактрыны – залішняга “афіцыёзу” ў сустрэчы не было. Член Савета Рэспублікі, старшыня Ушацкага раённага Савета дэпутатаў Наталля Марковіч, начальнік аддзела ідэалагічнай работы і па справах моладзі райвыканкама Пётр Алексяёнак, старшыня Маладзёжнай палаты Ушацкага раёна Лізавета Больц гутарылі з маладзёжным актывам адкрыта, прыводзілі цікавыя прыклады, дзяліліся ўласнымі меркаваннямі.
“Два дні работы Усебеларускага народнага сходу, дэлегатам якога я з’яўлялася, прайшлі канструктыўна. Усе эмацыянальна падтрымлівалі выступленне беларускага лідара, бо кожнае яго слова было важкім, дакладным, – прыгадала Н.Марковіч. – Галоўны пасыл – неабходнасць захавання міру і бяспекі ў нашай краіне. Не вядзіцеся на спробы апазіцыі разгойдаць абстаноўку (калі бачыце падобнае ў інтэрнэце, не замоўчвайце – паведамляйце ў ідэалогію, маладзёжную арганізацыю ці непасрэдна мне), добрасумленна працуйце на сваіх месцах, будзьце патрыётамі роднага краю”.
Апазіцыя робіць стаўку на моладзь, прапагандуючы свае ідэалы праз экстрэмісцкія каналы. Вывучаць навіны з праўдзівых крыніц – дзяржаўных сродкаў масавай інфармацыі – заклікаў усіх П.Алексяёнак.
Ужо напачатку 2025 года ў нашай краіне пройдзе важнейшая электаральная кампанія. Жадаючыя “ўставіць палкі” ў яе арганізацыю, падарваць моц дзяржавы знойдуцца, апазіцыя ўжо пачала актыўнічаць. “Гэтаму трэба супрацьстаяць! Будзьце для равеснікаў, членаў сваіх працоўных калектываў прыкладам, прапагандуйце правільныя палітычныя ўстоі – і тады Беларусь застанецца прыгожай, мірнай, квітнеючай”, – зазначылі эксперты.
У рамках сустрэчы абмеркаваны і іншыя пытанні: работа па добраўпарадкаванні, падрыхтоўка да мерапрыемстваў, запланаваных на чэрвень-ліпень. Многім цікавы фестываль экстрэмальных відаў спорту, на які ўжо пачаўся продаж білетаў. “Убачымся на спартыўных пляцоўках – неафіцыйна, аднак гэтак жа плённа”, – казалі маладыя людзі, пакідаючы залу.
Кацярына КАВАЛЕЎСКАЯ.
