Серыю выпускных вечароў на Ушаччыне традыцыйна распачаў развітальны баль у дзіцячай школе мастацтваў імя Д.У.Крупені. Сёлета героямі імпрэзы сталі 47 юнакоў і дзяўчат.
Кожны з іх узняўся на сцэну і атрымаў сваю порцыю апладысментаў. А бацькі, якія запоўнілі залу, з гонарам глядзелі на тое, чаму за гэты час навучыліся дзеці. Традыцыйна самы вялікі выпуск быў на аддзяленні народных інструментаў. Яго сёлетнія выпускнікі праслаўлялі школу на розных конкурсах: прозвішчы Дзяніса Лаюшкі, Глеба Кісяля, Ільі Крахоткі, Марыі Дуброўскай і іншых талентаў мы неаднойчы прыгадвалі ў газеце.
“Мне толькі ўчора знялі гіпс пасля пералому нагі, але я папрасіла родных прывезці мяне на свята, бо вельмі хацела ў гэты вечар быць побач са сваімі сябрамі, педагогам Нінай Яўгенаўна Жукавай, сыграць у любімым аркестры!”, – прызналася нам Жэня Мялешка.
Аж 15 выпускнікоў сёлета на аддзяленні харэаграфіі. “Для нашай сям’і яно асаблівае: 8 год таму яго скончыў сын Жэня, а сёння пасведчанне атрымала малодшая Ліза, – падзяліліся Ігар і Таццяна Іванюта. – Не па чутках ведаем, што за лёгкасцю рухаў стаіць цяжкая праца, шматгадзінныя рэпетыцыі, сінякі на каленках… Але магія танца захапляе: дачка хоча працягнуць навучанне і, магчыма, стаць харэографам – як любімы педагог Наталля Веньямінаўна Корнева”.
Адзінага выпускніка харавога аддзялення Сашу Калясінскага мы прывыклі бачыць у хоры, але ў гэты раз ён выйшаў на сцэну з сольным нумарам. Вельмі хваляваўся, але пранікнёна праспяваў вядомы ваенны твор “Журавы”.
Завяршылася ж імпрэза таксама песняй, якую выканалі педагогі розных аддзяленняў. Памятаць родную «музыкалку» і ніколі не развітвацца з творчасцю – такі наказ далі яны выхаванцам.
Наталля БАГДАНОВІЧ.
