Калі мы ўзгадваем тэматычны акцэнт гэтага года, то маем на ўвазе не толькі выпуск якаснай прадукцыі, а і ўзроўневую дзейнасць у нематэрыяльных сферах. Такой па праве можна назваць сёлетнюю работу Ушацкай дзіцячай школы мастацтваў імя Д.У.Крупені. Пра вынікі навучальнага года і планы на наступны пагутарылі з дырэктарам установы Наталляй Івановай.
– Для дзяцей вельмі важна не толькі паспяхова асвойваць прадметы, а і дэманстраваць атрыманыя навыкі.
– Безумоўна! Таму амаль усе нашы вучні выходзяць на сцэну ў разнастайных канцэртах, прымаюць удзел у алімпіядах, выставах, конкурсах. Што датычыцца апошніх, то за год навучэнцы школы атрымалі 59 дыпломаў рознага кшталту. Асабліва хочацца адзначыць поспехі двух нашых узорных калектываў на сёлетніх абласных конкурсах: хор “Вясёлка”, якім кіруе Жанна Віктараўна Савіцкая, атрымаў перамогу, а аркестр народных інструментаў на чале з Маргарытай Андрэеўнай Грынберг стаў лаўрэатам ІІ ступені. “Срэбрам” адзначаны і малодшы хор “Пралеска”. На аглядзе харэаграфічных калектываў Прыдзвіння вучні Наталлі Веньямінаўны Корневай заваявалі дыплом ІІІ ступені. Аня Бехава, Жэня Мялешка, Ягор Барысёнак і Ягор Дунік дастойна прадставілі школу на адборачных этапах Х Рэспубліканскага конкурсу выканаўцаў на народных інструментах імя Жыновіча. Піяністка Аня Сляцкая і балалаечніца Аня Мазго сталі лаўрэатамі І ступені на абласным спаборніцтве юных канцэртмайстраў. З конкурсу такога ж узроўню з дыпломамі вярнуліся Дзяніс Лаюшка (балалайка) і Глеб Кісель (баян), а таксама вакалісткі Вольга Цімафеева і Ульяна Храпавіцкая. Некалькі ўзнагарод здабылі дуэты – гітарысты Іван Мелехавец і Антон Маісееў, баяністы Мікалай Качан і Іван Клачок. У шэрагу конкурсаў паказалі добрыя вынікі юныя мастакі.
– Уяўляю, як ганарацца таленавітымі дзеткамі іх бацькі. Напэўна, прачытаўшы гэты ўнушальны пералік, таты і мамы пачаткоўцаў яшчэ больш умацуюцца ў жаданні прывесці іх у школу мастацтваў. Набор на наступны год ужо стартаваў?
– Так. Сёлета прымаем дзетак на ўсе нашы напрамкі: музычны (фартэпіяна, домра, балалайка, гітара, цымбалы, баян, акардэон, сінтэзатар, харавыя і эстрадныя спевы), выяўленчы і харэаграфічны. Падаць заяву і атрымаць кансультацыю можна на працягу мая з 12.00 да 20.00, а ў чэрвені – з 9.00 да 18.00. Даведкі – па тэлефоне 5-77-49. Уступныя экзамены запланаваны на 30 і 31 мая, а таксама з 3 па 7 чэрвеня ў азначаны вышэй час. Хачу нагадаць, што займацца ў нас могуць і дзеці, якія не залічаны ў школу, а таксама дарослыя – сёлета, напрыклад, ушачане бралі платныя ўрокі ігры на піяніна, сінтэзатары, выяўленчага мастацтва. Нашы педагогі могуць, напрыклад, падрыхтаваць выпускнікоў да паступлення ва ўстановы, дзе трэба здаваць малюнак.
– Ці плануецца кадравае папаўненне?
– Чакаем некалькіх маладых спецыялістаў. Да нас прыйдзе, напрыклад, ушачанка Марыя Кісялёва, якая вучылася па мэтавым накіраванні. Дарэчы, і сёлета ёсць жадаючыя паступаць у Наваполацкі музычны каледж. І нават калі дзеці выбіраюць іншыя прафесіі, з творчасцю, як правіла, не развітваюцца, бо яна напаўняе наша жыццё асаблівым сэнсам.
Ушацкую школу мастацтваў сёлета наведвае 341 навучэнец.
Гутарыла Наталля БАГДАНОВІЧ.
