Гукі нацыянальнага гімна і ўзняцце сцяга распачынаюць кожную дзяржаўную ўрачыстасць, а на мерапрыемстве, што ладзілася ва Ушачах 12 мая, гэты момант быў удвая значным: кіраўніцтва раёна, прадстаўнікі працоўных калектываў, моладзь прыйшлі ў гэту сонечную раніцу на цэнтральную плошчу, каб ушанаваць галоўныя сімвалы нашай краіны.
Ганаровае права ўзняць Дзяржаўны сцяг атрымалі супрацоўнік райаддзела МНС Антон Аўдошка, прозвішча якога днямі было занесена на раённую Дошку гонару, і неаднаразовая пераможца рэспубліканскай алімпіяды па біялогіі Ксенія Барысёнак.
Як падкрэсліла ў сваёй віншавальнай прамове член Савета Рэспублікі Нацыянальнага сходу Рэспублікі Беларусь Наталля Марковіч, Дзяржаўны герб, сцяг і гімн – галоўныя сімвалы незалежнасці, якія падкрэсліваюць адзінства нацыі, перадаюць гісторыка-культурную спадчыну нашага народа. Беражліва яе захоўваць і прымнажаць, быць патрыётамі сваёй Радзімы – такія абяцанні дала ўшацкая моладзь падчас урачыстасці.
“Мы – беларусы, мірныя людзі, сэрцам адданыя роднай зямлі”, – здаецца, больш трапна выказаць лейтматыў гэтага свята проста немагчыма.
