Зараз складана ўявіць наша жыццё без тэлефона, інтэрнэта, інтэрактыўнага тэлебачання. Такія паслугі аказвае абанентам Ушацкі ўчастак электрасувязі РУП “Белтэлекам”, работнікі якога ўчора адзначылі сваё прафесійнае свята.
Па шэрагу паказчыкаў ушацкія электрасувязісты традыцыйна займаюць высокія пазіцыі ў абласным рэйтынгу, трымаюць “залатую сярэдзіну”, абыходзячы многіх калег з Віцебшчыны, – і ў рэспубліканскім. На іх абслугоўванні зараз – 1594 кіламетры медных кабельных ліній, 323 – оптавалаконных, 37,7 – кабельнай каналізацыі з 809 аглядавымі калодзежамі і больш за 15 тысяч абаненцкіх прылад (прыставак).
– Папулярнасць ва ўшачан даўно заваявалі інтэрнэт ад Byfly (правадны і бесправадны), лічбавае тэлевяшчанне Zala, – расказвае начальнік участка Аляксандр Уладзіміравіч Шакута.
– Працягваем падключаць грамадзян да аптычнай сеткі GPON, самай прагрэсіўнай тэхналогіі доступу ў інтэрнэт, здольнай забяспечыць зайздросную хуткасць абмену інфармацыяй – да 100 Мбіт у секунду. У бліжэйшы час яе вартасці змогуць ацаніць у Арэхаўне, а ў 2025 годзе – абсалютна ўсе жыхары райцэнтра, аграгарадкоў Вяркуды, Глыбачка.
Актыўна працуюць спецыялісты і па падключэнні сістэмы відэакантролю. Устаноўленыя на многіх прадпрыемствах Ушаччыны камеры (іх 420) дазваляюць весці назіранне за тым, што адбываецца на тэрыторыі, не дапусціць пранікнення злачынцаў. Запатрабаванай аказалася паслуга і ў фізічных асоб – на сённяшні дзень на шматкватэрных дамах гарпасёлка працуе звыш 70 адзінак такога абсталявання (з захопам у аб’ектыў месца стаянкі аўтамабіляў, дзіцячых пляцовак), актыўна ўстанаўліваюць яго і ў прыватным сектары.
Аператыўна выязджаюць электрасувязісты – у тым ліку ў святы, выхадныя – на ліквідацыю розных паломак, пры падключэнні новых паслуг тлумачаць абанентам правілы карыстання прапанаванымі тэхсродкамі. Запатрабаванай у многіх застаецца магчымасць набыцця ў растэрміноўку праз участак РУП “Белтэлекам” рознай тэхнікі: ад мабільных тэлефонаў, камп’ютараў, фенаў да буйнагабарытных пральных машын, халадзільнікаў.
Вядома, намнога прасцей выконваць усе запланаваныя паказчыкі тады, калі падабраны адпаведныя кадры. З гэтым на Ушацкім участку электрасувязі праблем няма! Асобных слоў падзякі ад кіраўніцтва заслугоўваюць інжынер электрасувязі Ілья Пятровіч Жаваранак і вадзіцель Віктар Віктаравіч Гаманёк, узнагароджаныя да прафесійнага свята Ганаровымі граматамі Віцебскага філіяла РУП “Белтэлекам”. Па выніках работы за 2023 год прозвішча электраманцёра Пятра Сяргеевіча Клопава занесена на Дошку гонару Полацкага занальнага вузла электрасувязі, а электрамеханік Сяргей Віктаравіч Лукашэвіч аказаўся ў ліку лепшых работнікаў Ушацкага раёна, Мікалай і Уладзімір Шайтары ўзнагароджаны Ганаровымі граматамі раённага Савета дэпутатаў.
Для іх і іншых членаў калектыву электрасувязь даўно стала справай жыцця. Імклівае развіццё сферы перадачы даных, зносін на адлегласці патрабуе ад сувязістаў такога ж дынамізму. І яны з гэтым паспяхова спраўляюцца!
Кацярына КАВАЛЕЎСКАЯ.
