Готовимся к школе: на сколько «потянет» портфель?

Рыхтуй сані летам – сцвярджае народная мудрасць, а вось ранец трэба было збіраць вясной – аб гэтым сведчаць сённяшнія рэаліі. Цэны на школьныя прыналежнасці з мая выраслі ў 2-3 разы і… працягваюць расці. Заўсёды хочацца купіць свайму дзіцяці ўсё самае якаснае і прыгожае, і каб пры гэтым пакупкі моцна не ўдарылі па кішэні. Думаеце, гэта немагчыма? Памыляецеся! Вырашылі прааналізаваць кошт асноўных школьных тавараў па ўсіх гандлёвых кропках раёна, каб падказаць чытачам газеты, дзе і на чым можна зэканоміць.
Атрымалі спіс неабходных прыналежнасцяў для першакласніка, пачалі “прыцэньвацца”. Калі ў мінулыя гады ўшацкі пакупнік скардзіўся на адсутнасць выбару ў гандлёвых кропках, то сёлета ад тавараў літаральна разбягаюцца вочы. Ад цэн таксама. Мяркуйце самі: кошт пеналаў зараз вагаецца ад 6,5 да 19 тысяч рублёў, прычым абодва “рэкорды” зафіксаваны ў адным і тым жа месцы – на рынку. Розніца ў кошце тлумачыцца проста – новы прывоз. Аналагічная сітуацыя і з коштам на простыя 12-аркушавыя сшыткі: ва ўнівермагу ён складае 320 рублёў, на рынку – 400, а ў кіёсках “Белсаюздруку” – ужо 620. 
Кошт ранцаў зараз вар’іруецца ў межах 75-150 тысяч. Хочацца адзначыць, што ў прадпрымальнікаў на рынку могуць быць у наяўнасці ранцы мінулагодняга прывозу ці тавар з невялікімі дэфектамі – іх кошт ніжэйшы, а таму не саромейцеся папытаць прадаўца аб гэтым.
Не спяшайцеся з ходу купляць фламастары. Цэны на іх (6 колераў) розняцца ад 1270 рублёў (у кіёсках “Белсаюздруку”), 3500 (на рынку) да 7000 (ва ўнівермагу). Танныя акварэльныя фарбы на 12 колераў яшчэ можна знайсці ва ўнівермагу (4360 рублёў супраць 8600 на рынку), такія ж фарбы на 6 колераў за 1950 рублёў яшчэ ёсць у кіёсках “Белсаюздруку”. Самыя танныя каляровая папера і каляровы кардон знайшліся на рынку: 2400 і 3600 адпаведна. Лічыльныя палачкі каштуюць ад 2960 да 7750 рублёў (ва ўнівермагу).
Напэўна, найбольш ўразілі цэны на пластылін. Мінімальны яго кошт складае 1790 рублёў (у кіёсках “Белсаюздруку”), а вось пра максімум сказаць складана, бо прыходзілася бачыць і за шэсць-сем тысяч, і за дзесяць, і нават амаль за дваццаць. Цікава, што пластылін на 9 колераў ва ўнівермагу каштуе 3840, на рынку ён (толькі ўжо на 10 колераў) – 6700, а такі ж у кіёсках “Белсаюздруку” – 8100.
Падлічыць сярэднюю суму, якая пойдзе на ўсе гэтыя рэчы, складана. Яна будзе залежыць ад таго, наколькі ў вас хопіць цярплівасці хадзіць па магазінах і выбіраць там па 2-3 рэчы, але, як паказвае практыка, зэканоміць такім чынам можна значна.
К.КАВАЛЕЎСКАЯ.