Праграма “Сямейны капітал” дзейнічае з 2015 года і за гэты час на дэпазітныя рахункі сем’яў залічана больш 3 мільярдаў рублёў. З 2020 года можна датэрмінова выкарыстоўваць сродкі сямейнага капіталу на паляпшэнне жыллёвых умоў, медыцынскія паслугі, атрыманне адукацыі, набыццё сродкаў сацыяльнай рэабілітацыі. У больш як 80 працэнтах выпадкаў такім чынам вырашалася жыллёвае пытанне. З 12 ліпеня 2023 года дзейнічае пастанова Саўміна, якая пашырыла пералік падстаў аб адмове ў датэрміновым распараджэнні.
- Так, адмоўлена будзе пры неадпаведнасці абранага жылля ўстаноўленым для пражывання санітарным і тэхнічным патрабаванням, пры адмове ўласніка ад абследавання і пры неналежным выкананні абавязкаў па выхаванні і ўтрыманні дзяцей, калі датэрміновае распараджэнне сродкамі сямейнага капіталу супярэчыць іх інтарэсам.
Для прыняцця рашэння аб датэрміновым распараджэнні сродкамі сямейнага капіталу цяпер абавязкова запытваецца акт абследавання жылля, звесткі аб тым, ці знаходзяцца дзеці ў сацыяльна небяспечным становішчы або маюць патрэбу ў дзяржаўнай абароне, аб іх адабранні ў бацькоў па рашэнні камісіі па справах непаўналетніх.
- Рашэнне аб праве на датэрміновае выкарыстанне сямейнага капіталу можа быць прыпынена. Калі бацькоў па рашэнні суда пазбавяць бацькоўскіх правоў, у іх адбяруць дзіця (дзяцей) або адменяць усынаўленне, то органы апекі на працягу 3 рабочых дзён з дня паступлення адпаведнага рашэння паведамляюць аб гэтым у райвыканкам, ім не пазней 7 працоўных дзён прымаецца рашэнне аб прыпыненні і ААТ “ААБ Беларусбанк” спыняе пералічэнне.
Пры набыцці жылля за сродкі сямейнага капіталу цяпер абавязкова трэба звярнуцца ў трохмесячны тэрмін за рэгістрацыяй на права ўласнасці на кватэру ці дом і (або)дзяржаўнай рэгістрацыяй забароны на яго адчужэнне. А райвыканкам будзе маніторыць выкарыстанне сямейнага капіталу па мэтавым прызначэнні.
Вікторыя ГУГІНА,
намеснік начальніка ўпраўлення па працы,
занятасці і сацыяльнай абароне райвыканкама.
