У суботу шчаслівыя жыхары аграгарадка Глыбачка паведамлялі, што па працяглай Цэнтральнай вуліцы дарожнікі кладуць асфальт, а ў панядзелак застала брыгаду ДРБУ-105 на мосце ля возера “Вечалле”. Прычэп трактара быў закладзены металічнымі рэйкамі, балтамі, а ўдарным рабочым інструментам супрацоўнікаў аказалася кувалда. “На метр заганяем апору, – паказаў мне чорную метку, якая павінна зраўняцца з зямлёй, Анатоль Васільевіч Дзям’янаў і патлумачыў. – Адбойнікі на мосце павінны замацоўвацца праз 2,5 метра, пакуль што толькі праз пяць, вось і робім па норме”.
Адбойнікі ці бар’ернае загароджанне ўзвышаецца над пляжам, каб у экстраннай сітуацыі, калі вадзіцель не справіцца з кіраваннем, машына не аказалася ў зоне адпачынку. Сродкі на гэтыя мэты выдзелены бюджэтныя, а работы запланаваны. А вось рамонт разбітага палатна па Глыбачцы “вітаў у аблоках”. Сабе такую задачу дарожнікі ставілі, калі спадзяваліся на дадатковыя сродкі з рэспубліканскай праграмы “Дарогі Беларусі”, якія меркавалася пусціць на выезд з аграгарадка на Павулле. Аднак замест чакаемага мільёна разлічваюць на 380 тысяч, таму 840 метраў па Глыбачцы паклалі на зэканомленыя сродкі. Як гэта магчыма?
“Грошы таксама бюджэтныя, з тых, што выдзяляліся ў пачатку года на асфальтаванне пад’ездаў да Матырына, санаторыя “Лясныя азёры”, павароту на Федаронкі, якія мы, дарэчы, выканалі раней плана. А паколькі на працягу года рэгуляваліся цэны на матэрыялы, у прыватнасці, дзешавеў бітум, і атрымалася эканомія, – тлумачыць галоўны інжынер ДРБУ-105 Андрэй Міхайлавіч Агіевіч. – 500 тон асфальту закаталі за два дні, а яшчэ 350 метраў у напрамку майстэрні – на другім тыдні. На гэты ўчастак зрасходавана 105 тысяч рублёў і галоўнае, закрыты вялікія выбоіны, што былі на гэтай ажыўленай дарозе. Прыемна ехаць, як і наогул радаваць людзей новым асфальтам, тым больш пазапланавым. Таму за дадаткова выдзеленыя сродкі мяркуем укласці два кіламетры дарогі на Полацк праз Варонічы (на мяжы з суседнім раёнам) – гэта траса вельмі запатрабавана падчас рамонту шашы Р-46, а палатно жадае быць лепшым. Хочам ажыццявіць і даўні запыт: зрабіць дзве “кішэні” для развароту аўтобусаў і прыпынак у вёсцы Лісічына. Ёсць і іншыя ўчасткі, лепш паведамім, калі зробім”.
Вольга КАРАЛЕНКА.
