У двары другога корпуса дома №2 па вуліцы Віцебскай на гэтым тыдні стаяла ажно тры вышкі – нават на апошняй новабудоўлі ў гэтым мікрараёне было меней. Рамонт вядзецца паралельна на даху, сценах і падмурку, таму задзейнічаны работнікі з розных участкаў УП ЖКГ, якому і даверылі гэты складаны аб’ект. І яны спраўляюцца нават без субпадрадчыкаў, заказваючы толькі тэхніку з іншых арганізацый.
Ля чацвёртага пад’езда кран абслугоўваў работнікаў, якія не першы месяц мянялі дах – ён застанецца такім жа – плоскім, але заліваецца наноў. Выезд са двара перакрываў “міксер” – з Наваполацкага завода ЖБВ паступіў бетон для заліўкі ганкаў. Апалубка, над якой шчыравалі работнікі Ільюшынскага ўчастка, падказвала, што прыкметна шырэйшай будзе пляцоўка ля дзвярэй, таму і аб’ёмы ўнушальныя, простай бетонамяшалкай не абыдзешся. Адпаведна прыкметна “вырас” і ўвесь ганак – цяпер нават з дзіцячай каляскай лёгка “развярнуцца”. Падрыхтавалі ільюшынцы фронт работ і ля ўсіх чатырох пад’ездаў, а вакол дома ўжо ляжала новая адмостка. На яе ўкладцы, толькі з супрацьлеглага боку, спецыялістаў з аграгарадка пад кіраўніцтвам майстра ўчастка Валерыя Волкава (на здымку) сустракалі і ў халодным маі. Акуратна выстаўлялі вешкі, каб роўна ўстанавіць бардзюры, якія потым “хавалі” роўна з новым слоем бетону. І калі першыя прывезены ўжо гатовыя, то раствор тады рыхтавалі на месцы. Старую адмостку, якая мела шчыліны, знялі поўнасцю. Такое бетанаванне з’яўляецца абавязковай часткай работ як на шматкватэрных, так і прыватных дамах, каб не разбураўся фундамент. Ільюшынскія камунальнікі і ў аграгарадку не толькі ацяпляюць кватэры, але і рамантуюць балконы, ганкі. Цяпер жа наогул на любую будоўлю могуць падацца. Менавіта гэтаму ўчастку даверылі і ўкладанне бетонных дарожак, якія з’явіліся ля пад’езда да дома не ў межах праекта, а дадатковым бонусам.
Ля другога пад’езду таксама сустрэла “старога” знаёмага Івана Петухова. Праўда, разгледзела яго, толькі падняўшыся на чацвёрты паверх. Цяпер газаэлектразваршчык разам з Міхаілам Кісялёвым, прышпіліўшыся да люлькі пад’ёмніка, мянялі абшыўку балконаў. А ў сакавіку наадварот працавалі ў падзямеллі, замяніўшы ў падвале ўсе ацяпляльныя і водаправодныя трубы.
Замест плоскага шэрага шыферу балконы абшыты жоўтым металапрофілем – у тон асноўнай афарбоўкі дома, якая поўнасцю супадае з бежавай “вопраткай” суседа – першага корпуса, што рамантавалі летась. Такая ж “сукенка” апранута і на знешнім баку дома. Прычым, каб абсалютна роўнымі атрымаліся карычневая дэкаратыўныя палоскі, маляры Наталля Кароткая і Павел Яфанаў (на здымку) спачатку прыклейвалі скотч – пазначалі лініі для праходжання валіка. Гэта апошні слой, што лёг на закрытую цэглу і схаваў “шубу”, а таксама тынкоўку. Няхай і не прадугледжана капрамонтам уцяплення спецыяльным пенапластам, аднак і гэтыя меры павінны зменіць мікраклімат у кватэрах з тарцовымі сценамі, якія ўзімку былі “ледзянымі”.
А вось на дах так і не паднялася – камунальнікі папярэдзілі, што застануся там, пакуль не застыне бетон. Вымушаны былі пераскокваць праз перашкоды і жыхары, аднак усе разумеюць, што нязручнасці – часовыя, а адрамантаваны дом будзе радаваць не адно дзесяцігоддзе. Пра іншыя пазапраектыя бонусы камунальнікаў паведамім пасля здачы аб’екта, якая ўжо не за гарамі.
Вольга КАРАЛЕНКА.
