Ганна родам з Сенненшчыны. Пэўна, і не магла яна нарадзіцца іншай, бо бацька – майстар на ўсе рукі, выкладае ў школе працоўнае навучанне, вядзе гурткі. Маці – тонкі і пранікнёны чалавек, які прысвяціў сваю прафесійную дзейнасць яе вялікасці музыцы. Дзядулі па абедзвюх лініях былі “з залатымі рукамі”, умелі ўсё, а кошыкі з лазы рабілі такія, нібы выйшлі з-пад станка. Так што дзяўчына яшчэ са школьных гадоў пацвердзіла ўсім, што яна пераняла пакрышачку ад усіх: маляваць, плесці, вязаць, майстраваць…
Падчас мінулага знаёмства з Г.Бабянок мы гаварылі аб прыгожых работах з саломкі і бісеру, разглядалі яе вышыўку і фларыстыку. Усё гэта ўжо ўчарашні дзень, як канстатуе Ганна. Сёння ў полі яе зроку новы накірунак у фларыстыцы – тэхніка “тэрра”, якая ўключае работу са шпаклёўкай і фларыстычным матэрыялам ад пялёсткаў да карэньчыкаў раслін. Карціны атрымліваюцца настолькі незвычайнымі, што дух захоплівае. Прыглядзішся, здаецца, з “нічога” выраблена, а вачэй не адвесці. Гэтую навізну мая гераіня адкрыла падчас наведання экалагічнага цэнтра ў Віцебску. Там выстаўлялася нешта падобнае. Яна больш дакладна даведалася пра тэхніку выканання такіх карцін і дала волю фантазіі пры стварэнні сваіх работ. Зацікавіла гэтым і дзяцей, выхаванцаў свайго гуртка “Волшебство рукоделия”.
Не закінула і бісерапляценне. І гэты занятак выйшаў на новы творчы ўзровень, дзякуючы інтэрнэту, дзе яна заўсёды шукае нешта новае па цікавячых тэмах. Цяпер з-пад яе ўмелых рук выходзяць дзіўныя звяркі, вырабленыя з пацерак па тэхніцы “кіксайскага пляцення”, незвычайна прыгожымі атрымліваюцца карціны з матылькамі па новай, асвоенай ёю тэхніцы бісерапляцення “кирпичный шов”. Гэта сваё майстэрства яна перадае дзецям на гуртку “Чарадзейка”.
Вельмі арыгінальнымі карцінамі выглядаюць яе аплікацыі з бяросты. У гэтым накірунку Ганна бясконца імправізуе, а таму нават дзвюх аднолькавых работ пры ўсім жаданні ў яе не атрымліваецца. Не закінула і саломапляценне. Толькі цяпер работы сталі больш дасканалымі. Вельмі прыгожым атрымаўся герб г.п.Ушачы, выраблены з саломкі.
Асаблівае пачуццё прыгожага адчуваецца ў ёй, калі глядзіш на кветкавыя кампазіцыі: распісаная фарбамі бутэлька з арыгінальным букетам з прыроднага матэрыялу як подых рамантычнасці і палёту фантазіі.
Да Новага 2010 года, які праходзіць пад знакам Тыгра, Ганна Бабянок напісала карціну з выкарыстаннем тэхнікі “батык” (роспіс па тканіне), дзе ў цэнтры ўвагі прыгожы тыгр з пераможным відам.
Нядаўна яе выхаванцы прывезлі шэсць Ганаровых грамат за ўдзел у абласной выставе-конкурсе фітадызайну і столькі ж узнагарод яны заваявалі падчас правядзення раённай выставы-конкурсу дэкаратыўна-прыкладнога мастацтва. А Ганна Аляксандраўна Бабянок атрымала Падзяку ад намесніка генеральнага дырэктара абласнога аб’яднання па арганізацыі пазашкольнай работы Н.Г.Янцэвіч за падрыхтоўку і правядзенне прэзентацыі панарамы творчых ідэй “Майстэрня Дзеда Мароза” ў рамках абласнога семінара-практыкума для кіраўнікоў гурткоў устаноў пазашкольнага выхавання і навучання “Культурная спадчына, як духоўная каштоўнасць выхавання і развіцця дзяцей і падлеткаў”.
Трохгадовая дачушка Ганны, Даша, вельмі цікавіцца ўсім, што вырабляе маці. Імкнецца прысуседзіцца каля яе і нешта таксама рабіць. Вельмі любіць маляваць, выразаць з паперы розныя формы і нават нанізвае пацеркі на нітку з асаблівым стараннем і ўседлівасцю. Верыцца, што некалі і пра яе творчасць напішуць нашы паслядоўнікі-журналісты. А.ПАШКОВІЧ.
На здымку: Ганна Бабянок.
