“У вашай раённай бальніцы дастойны ўзровень. Бачу нядрэнную аснашчанасць абсталяваннем, добраўпарадкаванне, а яшчэ добры настрой працаўнікоў!” – адзначыў старшыня Рэспубліканскага камітэта Беларускага прафсаюза работнікаў аховы здароўя В.Д.Шыла, які на мінулым тыдні наведаў з рабочай паездкай наш раён. Дарэчы, на Ушаччыне Вячаслаў Дзмітрыевіч быў упершыню, а таму жыва цікавіўся не толькі тэмай аховы здароўя.
У цэнтральнай раённай бальніцы лідар галіновага прафсаюза сустрэўся з актывам “пярвічкі” і пацікавіўся ў яго старшыні М.Г.Харэвіч ахопам калектыву прафсаюзным членствам. Марына Генадзьеўна паведаміла, што членамі прафсаюза ў вялікім калектыве не з’яўляецца ўсяго некалькі чалавек, а прафсаюзная арганізацыя райбальніцы ўжо не першы год адна з лепшых у раёне, работнікі атрымліваюць шэраг гарантый, для іх ладзяцца цікавыя паездкі і экскурсіі, конкурсы прафмайстэрства, у цяперашні час, напрыклад, рыхтуецца мерапрыемства для маладых спецыялістаў.
Пагутарыў В.Д.Шыла і з працаўнікамі фізіятэрапеўтычнага аддзялення, дыягнастычнай лабараторыі, рэнтгенкабінета, рэгістратуры. Цікавіўся ўмовамі працы, адпачынку, заработнай платай, настроем на работу маладых медыкаў.
Наведаў прафсаюзны лідар і фельчарска-акушэрскі пункт у Ільюшыне. Як падкрэсліла падчас знаёмства галоўны ўрач А.А.Міранкова, загадчыка ФАПам Алену Міхайлаўну Качан вельмі паважаюць і цэняць жыхары аграгарадка і навакольных вёсак. В.Д.Шыла ўручыў жанчыне падарунак ад прафсаюза і падзякаваў за работу.
Яшчэ адным пунктам у маршруце па раёне быў санаторый “Лясныя азёры”. Пра нашу здраўніцу Вячаслаў Дзмітрыевіч чуў шмат станоўчых водгукаў. Тое, што яны небеспадстаўныя, пабачыў, як кажуць, на свае вочы, азнаёміўся з умовамі лячэння, харчавання, адпачынку. Ды і сама прырода ў дадатак да ўсіх выгод тут спрыяе аздараўленню. Дарэчы, зараз санаторый запоўнены больш чым на 100 працэнтаў.
У рамках свайго візіту В.Д.Шыла сустрэўся і са старшынёй райвыканкама С.С.Садоўскім. Былі абмеркаваны многія тэмы, у прыватнасці, старшыня рэспубліканскага камітэта падтрымаў ініцыятыву кіраўніка раёна аб тым, што на Ушаччыне павінен быць і перасоўны ФАП. Такія мабільныя пункты на колах ужо паспяхова працуюць у многіх раёнах Беларусі.
Вольга КАМАРКОВА.
