Ну якая гаспадыня можа прайсці спакойна міма петуній? Упэўнена, што такіх нямнога. Адны не могуць утрымацца і купляюць насенне, другія набываюць гатовую расаду. І нават тыя, у каго няма ўласных клумбаў, захапляюцца гэтай кветкай, бачачы яе ў іншых. Асаблівая любоў да петуній і ў Кацярыны Дубровінай з Градзянца, яе сядзіба зараз патанае ў квецені. Але каб радавацца вось такой прыгажосці, канечне, зусім недастаткова проста пасадзіць насенне ў зямлю.
Вырошчванне гэтай расліны для маладой жанчыны стала сапраўдным захапленнем 4 гады таму. Жаданне стварыць прыгажосць у спалучэнні з ведамі (а Кацярына аграном па спецыяльнасці) далі шыкоўны эфект. Каб усё лета петунія радавала сваімі фарбамі, пачынаць працаваць з ёй трэба ўжо зімой. «Каб у маі атрымаць першыя кветкі, сею ў студзені петунію ў кантэйнеры і стаўлю ў цёплае месца. Да слова, аддаю перавагу менавіта галандскім сартам. Ад моманту ўсходаў да цвіцення патрэбна 3 месяцы, – расказвае Кацярына. – Адразу адзначу, што без дадатковай падсветкі ў гэты час не вырасце добрай петуніі, а таму абавязкова над расадай уключаю лямпы. Грунт выкарыстоўваю гатовы на аснове торфу. Зямля з агарода – не варыянт, яна цяжкая для гэтай кветкі і хутчэй за ўсё расада захварэе. Пікірую, калі з’яўляецца 3-4 лісцікі, на гэтым этапе петуніі камфортна пры тэмпературы 16-20 градусаў. Па меры росту трэба акуратна перасаджваць у большую тару. А пасля з’яўлення 5-6 ліста пачынаю перыядычна падкормліваць. Не забудзьце прышчапіць расаду перад цвіценнем. Калі надыходзіць час высадкі петуній на вуліцу, важна правільна падабраць для іх вазоны, кашпо. Чым больш – тым лепш, у малым аб’ёме кветка не раскрые ўвесь свой патэнцыял. Самы мінімальны – 3,5 літра, а, напрыклад, сарты «Шок вейв ред», «Ізі вейв» саджу у 35-літровыя і да восені ён будзе ўвесь заняты каранямі. І яшчэ адно залатое правіла: адна петунія – адно кашпо, бо яны будуць канкурыраваць паміж сабой за месца і ў выніку не дадуць эфекту. Гэтым летам у мяне цвіце каля 20 відаў».
Калі вы купілі гатовую расаду, Кацярына раіць адразу перасадзіць яе ў большы вазон, на дне якога абавязкова павінны быць адтуліны і дрэнаж. Праз тыдзень можна падкарміць петунію любым комплексным угнаеннем. Дарэчы, кветка вельмі ўдзячна за гэта, таму на працягу ўсяго лета паўтарайце працэдуру раз у 10 дзён, а ў надта спякотнае надвор’е і таго часцей. Абавязкова абразайце кветкі, якія адцвілі, насенныя каробачкі адбіраюць сілу ў расліны. Зусім нялішнія амалоджваючыя стрыжкі (за выключэннем ампельных гатункаў). Не трэба шкадаваць пры гэтым кветак і бутонаў – праз тыдзень петунія парадуе вас яшчэ больш прыгожымі. Можна пасадзіць яе і ў адкрыты грунт, але ўлічыўшы некалькі момантаў: даць прастору у 50 сантыметраў з усіх бакоў, на клумбе павінна быць паўцень, не спадабаецца кветцы і дужа вільготнае месца. У цяперашні час, калі пачынаюцца начныя туманы, каб абараніць кветкі ад хвароб, Кацярына апрацоўвае іх фітаспарынам.
Як бачым, каб вока радавала вось такая прыгажосць, трэба прыкласці шмат намаганняў. «Ваджуся з петуніямі, як з дзецьмі!» – усміхаецца маладая мама ў дэкрэтным водпуску. Любіць яна і іншыя кветкі – алісум, гваздзікі, астры, лабелію. Паспявае ўдзяліць час і агародным справам – сям’я ўжо ва ўсю нарыхтоўвае і ўжывае перцы, баклажаны, агуркі, таматы. Усё можна вырасціць на сваім участку, галоўнае – жаданне працаваць.
Вольга КАМАРКОВА.
