Нельга не звярнуць увагу на яркую аранжавую тэхніку, што павольна рухаецца па вуліцах гарпасёлка, пакідаючы за сабой невялікі шлейф пылу. Апошні, дарэчы, станавіўся ўсё меншы, паколькі менавіта на падмятанне вуліц і разлічаны “Чыстадор” – навінка, атрыманая ў канцы мінулага года жыллёва-камунальнай гаспадаркай. У арсенале прадпрыемства, канечне, была тэхніка, што падмятае асфальт – звычайныя шчоткі, якія мацаваліся за трактарам і прыбівалі пясок да бардзюраў, што потым уручную ўбіралі дворнікі. Новая “прыбіральшчыца” з усім спраўляецца самастойна, пясок па транспарцёры паступае ў кузаў грузавіка.
– Калі набіраецца поўны, адчэпліваю “Чыстадор” і адвожу пясок на пескабазу. У першыя дні, калі выехаў на горад, прычэп грузіўся за 20-25 хвілін, зараз ужо за 45, – расказвае вадзіцель Ігар Уладзіміравіч Мірончыкаў (на здымку). – Агрэгат добры, праўда, разлічаны пераважна на роўныя вуліцы, на заваротах з-за даўгой счэпкі можа пакідаць агрэхі, таму хаджу пераважна па цэнтральных і роўных перыферыйных.
Новы агрэгат – дадатковы фронт работ вадзіцеля, які на сваім самазвале займаецца перавозкай розных грузаў, а таксама мае яшчэ адзін прычапны агрэгат – бочку для адкатвання каналізацыі. “Пыласос” чапляе не штодня – а пры забруджанасці вуліц.
“Чыстадор” дазволіў не толькі аўтаматызаваць працэс і больш хутка прыбіраць вуліцы ад пяску, але і ўвогуле пашырыць сетку чыстых дарог. Падмятальна-уборачная машына набыта УП ЖКГ у лізінг з першапачатковым узносам 28 тысяч рублёў, каштуе ж у сем разоў больш – 200 тысяч 600 рублёў.
Вольга КАРАЛЕНКА.
