Цяжка адшукаць больш складаную, ды і незайздросную працу, чым у работнікаў водаканала. Гэта для выканаўцаў. І адну з самых патрэбных для нас, спажыўцоў. Адчуваеш гэта, калі кран па-здрадніцку не выдае ні кроплі не тое што гарачанькай – ніякай. Добра, калі ў двары ёсць калодзеж, і тое сто разоў прыгадаеш пра выгоды цывілізацыі. А калі і студні няма.
Таму супрацоўнікаў участка водаканалізацыйнай гаспадаркі “Полацкводаканала” чакалі на мінулым тыдні сваім мікрараёнам прыватных дамоў па Ленінскай, як багоў. Дзве брыгады ўжо раз’ехаліся па загадзя запланаваных маршрутах, і адна з машын прыбыла да нас пасля абеду. Пачалі з самага складанага – пошуку прычыны збою. Знешне ўсё як звычайна, на паверхні ніякага працякання, як і ў дамах, а што там пад зямлёй? І вось яны ля апошняга вузла з адгалінаваннямі да спажыўцоў. Толькі вентылі і трубы грунтоўна схаваны ў вадзе. Адпампавалі – трэба зазначыць, што машына брыгады ўкамплектавана ўсім неабходным: і генератар на выпадак зваркі труб, і помпа для адкачвання вады. А далей уручную вычэрпвалі застойную “кашу”, папярэдне адшукаўшы “дно”. Вельмі нязручна было паварочвацца ў вузкім коле, якім агароджаны вузел, нават самаму хударляваму з супрацоўнікаў, электрагазазваршчыку Віталю Мікалаевічу Маісеенку. Дапамагалі, абмяркоўваючы варыянты знікнення вады, майстар Сяргей Ягоравіч Мацюш і слесар аварыйна-аднаўленчых работ Сяргей Уладзіміравіч Хаткевіч. Меркавалі ўжо, дзе назаўтра давядзецца перакрываць лінію, колькі без вады часова людзей застанецца, і ці атрымаецца пад ціскам памяняць запорны кран, бо думалі пра самы апошні варыянт – раскопваць месца злучэння труб экскаватарам.
Не ведаю, хто ўзрадаваўся больш, калі гэтага не спатрэбілася. Віталь Мікалаевіч усё ж дабраўся да заржавелай арматуры. І вярнуўшыся ўвечары з работы, усе жыхары канстатавалі наяўнасць у кранах добрага ціску.
Так штодня праходзяць іх працоўныя будні. Старшы майстар участка Андрэй Сяргеевіч Дзямешка кажа, што на дні паступае па некалькі выклікаў з усіх куткоў раёна. У любое надвор’е ліквідуюць парывы састарэлага водаправода, размарожваюць калонкі, чысцяць забітую каналізацыю. Здараецца, што за дзень і не атрымоўваецца справіцца з паломкай. Аднак яны не кідаюць справу незавершанай, калі работы экстранныя, а працоўны дзень ужо закончаны. Застаюцца – колькі патрэбна. Добра ведаюць гэта, напрыклад, жыхары вуліцы Школьнай у гарпасёлку. Парыў камунікацый адбыўся 31 снежня. І Новы год сустракаць водаканальшчыкі разышліся па дамах у дзве гадзіны ночы. Затое людзі на свята былі з вадой.
Звязацца з Ушацкім участкам водаканалізацыйнай гаспадаркі можна па тэлефоне 3-10-18 (да 10 гадзін), а пакінуць заяўку па адзіным нумары 115 ці ў дыспетчарскай “Полацкводаканала” (8-0214) 77- 41-75.
Вольга КАРАЛЕНКА.
