Аб тым, што засумавалі ўшачане без святаў, сведчыў адвячорак суботы. 18 снежня на цэнтральнай плошчы гарпасёлка адбылося ўрачыстае адкрыццё навагодняй ёлкі раёна, на якое сабралася безліч людзей, а галоўнымі ўдзельнікамі свята прадказальна былі дзеці. Хаця і дарослыя не шкадавалі галасоў і далоняў, калі прасілі ў Дзядулі Мароза запаліць агні на прыгажуні.
Ёлку падабралі сёлета сапраўды статную, хоць і адшукалі недалёка – расла ля бальніцы. Устанавілі і ўпрыгожылі камунальнікі яе за дзень, ды і свяцілася, уздымала настрой яна пару дзён да адкрыцця. Не хапала толькі свята, якое і зладзілі супрацоўнікі раённага цэнтра культуры і народнай творчасці з дапамогай іншых калектываў. Так, калі яшчэ толькі падцягваўся народ, малыя ўжо вудзілі рыбку на гульнявой пляцоўцы цэнтра дзяцей і моладзі, кідалі на трапнасць сняжкі і “прымяралі” касцюм снегавіка. Зрабіць гэта было прасцей-простага – у фотазоне заставаўся толькі радасны твар, астатні ўбор быў гатовы.
Работнікі цэнтралізаванай бібліятэчнай сістэмы спрасцілі задачу тым, хто хацеў павіншаваць сяброў з надыходзячым 2022-м – дастаткова было толькі выцягнуць паштоўку і агучыць цёплыя словы. Ну і таксама правяралі на кемлівасць, падрыхтаваўшы шмат конкурсаў. Канечне ж, пераможцаў чакалі прызы.
Сувеніры да святаў прапаноўвалі работнікі тэрытарыяльнага цэнтра сацыяльнага абслугоўвання насельніцтва і Дома рамёстваў. Хоць і казала прадстаўніца апошняга Валянціна Мугака, што большасць работ перадалі на выставу ў вобласць, выбар тым не менш заставаўся немалы, у тым ліку і сімвал года – Тыгр, намаляваны на драўляным спіле.
Сагрэцца гарачымі напоямі і выпечкай ў гэты даволі слотны вечар прапаноўвалі супрацоўнікі грамадскага харчавання Ушацкага філіяла аблспажыўтаварыства. Нагандлявалі нямнога – 145 рублёў, але калі ўлічыць, што гэта выключна на чаі і розных піражках ды булачках (спіртное ў гэты дзень не прадавалі нават у цэнтральных магазінах), то колькасць наведвальнікаў кропкі можна смела падвоіць. Ну а юныя аўтамабілісты выпрабоўвалі на спрыт крутыя машыны, што напракат выдавалі супрацоўнікі фізкультурна-аздараўленчага комплексу “Юнацтва-Ушачы”. Чарга стаяла, так што юны Данік Пацэйка на гэты раз не споўніў намер стаць кіроўцам джыпа. Затое наплясаліся з сястрычкай Янай і братам Стасам уволю. Менавіта ўнукі спакусілі на вандроўку да ёлкі бабулю Людмілу Васільеўну, якой свята таксама спадабалася былой масавасцю і знаёмымі з юнацтва матывамі.
Наведвальнікаў ля гульнявых пляцовак значна паменела, калі на сцэне пачалося дзейства. З віншаваннямі да ўшачан звярнуўся старшыня Ушацкага райвыканкама Сяргей Сяргеевіч Садоўскі, які не толькі жадаў далейшага квітнення Ушаччыне, але спыніўся на тых важных задачах і падзеях, што чакаюць у надыходзячым годзе.
Дарэмна спрабавалі дарослыя спыніць малых, якія выбягалі танчыць ля сцэны пад вядомыя навагоднія шлягеры. Іх было не стрымаць, ды, шчыра кажучы, ногі так і ішлі ў скокі, што было вельмі дарэчы, каб сагрэцца. З’явіліся Дзед Мароз і Снягурка, ды адразу сем пар. Па іх закліку, а таксама ўсіх удзельнікаў і запаліліся агні на цэнтральнай ёлцы, якая з гэтага моманту стала цэнтрам увагі. Вакол яе не адзін раз вадзілі карагод усе, хто хацеў быць здаровым, каханым, шчаслівым. Жадаючых прадказальна знайшлося шмат, і калі хвост ланцужка яшчэ заставаўся ля сцэны, сімвал года Тыгр, які ўзначальваў калону, ужо вяртаўся назад. Не паменела жадаючых і паўдзельнічаць у навагодніх забавах. Танцавалі, паўтараючы рухі Снягуркі Дзіны Пенкальскай, збівалі сняжкамі штучныя ёлкі і нават хадзілі на лыжах. Так, нязручна без снегу, але тым больш смешным аказаўся конкурс, а менавіта на выклік эмоцый і разлічаны такія святы.
Няспешна разыходзіліся яго ўдзельнікі. І літаральна ўсе неслі дадому выдатны настрой і жаданне стварыць такую ж узнёслую атмасферу і дома. Многія ўжо запалілі агеньчыкі на вокнах і дамах, а некаторыя нават ёлкі ўпрыгожылі. Дарэчы, з 18 снежня набыць навагоднія дрэўцы можна ля галоўнай ёлкі раёна – на цэнтральнай плошчы. Гандлявалі прадстаўнікі лясгаса і падчас адкрыцця.
Вольга КАРАЛЕНКА.
