Нягледзячы на паляпшэнне эпідсітуацыі ў краіне і ва Ушацкім раёне, у прыватнасці, расслабляцца зараз, упэўнены спецыялісты, ні ў якім разе нельга. Не за гарамі чарговая хваля каранавіруса, прычым, даволі складаная.
Па даных Сусветнай арганізацыі аховы здароўя, новы штам “Амікрон” распаўсюджваецца лягчэй, чым іншыя варыянты COVID-19, паколькі ўтрымлівае частку віруса прастуды. Пад удар могуць трапіць літаральна ўсе, у тым ліку моладзь, дзеці. Яшчэ адзін нюанс, які павінен насцярожыць, – вельмі кароткі прамежак часу паміж каранавіруснымі хвалямі. Не кожны арганізм здолее пасля перанесенага нядаўна захворвання зноў з ім справіцца. Ну а па-трэцяе, “функцыянаваць” COVID-19 на гэты раз будзе паралельна з грыпам, што таксама надзвычай небяспечна.
– Што можна параіць ушачанам? Як мага хутчэй правакцынавацца! – кажа намеснік галоўнага ўрача райбальніцы па медыцынскім абслугоўванні насельніцтва Н.В.Дрозд. – Зрабіць гэта па-ранейшаму можна ў паліклініцы і бальніцах сястрынскага догляду, на працоўным месцы і дома (па папярэдняй заяўцы), а таксама на мабільных пунктах вакцынацыі. Нагадаю, што працуюць апошнія кожны дзень: з панядзелка па пятніцу – з 9 да 12 гадзін у будынку дзіцячай бібліятэкі (г.п.Ушачы, вул.Ленінская, 28), у суботу і нядзелю – з 10 да 13 гадзін у цэнтры культуры і народнай творчасці.
Вось толькі жадаючых скарыстацца надзейнай зброяй у барацьбе з каранавірусам (так называюць вакцынацыю эксперты медгаліны) пакуль нямнога. Па словах Наталіі Васільеўны, у мінулыя выхадныя на мабільным пункце праімунізавалася 28 жыхароў раёна, з панядзелка па сераду – толькі 12. Медыкі спадзяюцца, што актыўнасць у гэтым пытанні з боку ўшачан у бліжэйшы час павысіцца.
Што датычыцца вакцын, з імі праблем няма. Днямі ў райбальніцу паступіла чарговая партыя “Спутніка V” (два кампненты па 150 доз), кітайскага прэпарата (1200 доз). Ёсць у наяўнасці і “Спутнік Лайт”. Дарэчы, выкарыстаць яго цяпер можна не толькі для рэвакцынацыі – па афіцыйных даных, падыдзе прэпарат і для тых, хто перанёс каранавірус, а пасля выздараўлення прайшло 2-4 тыдні.
– Пакуль дазваляе эпідсітуацыя, раім жыхарам раёна, якія маюць розныя паталогіі, не адкладваць таксама ў доўгую скрыню праходжанне абследавання, рэабілітацыі, – падкрэслівае Н.В.Дрозд. – Падчас хуткай хвалі каранавіруса зрабіць гэта будзе праблематычна.
Кацярына КАВАЛЕЎСКАЯ.
