Кветкі, прэзенты, цёплыя віншаванні… І хоць любімае многімі свята – Дзень маці – сёлета на Ушаччыне масава не адзначалася з-за эпідэмічнай сітуацыі, яркіх эмоцый прадстаўніцы прыгожай паловы чалавецтва атрымалі, як заўсёды, шмат.
Годную акцыю правялі ў чацвер супрацоўнікі тэрытарыяльнага цэнтра сацыяльнага абслугоўвання насельніцтва – арганізавалі аб’езд ушацкіх матуль, якія выхоўваюць дзетак з асаблівасцямі псіхафізічнага развіцця. Ужо ў першай палове дня шчырыя пажаданні гучалі ў адрас Ірыны Віктараўны Лявонцьевай, Людмілы Міхайлаўны Тарасевіч, Вольгі Мікалаеўны Каваленкі, Алены Мікалаеўны Фамічовай і Вольгі Іванаўны Ляхоўскай (прыёмная маці), якія акрамя ўскладзеных на свае плечы няпростых абавязкаў па выхаванні нашчадкаў, з’яўляюцца бяззменнымі ўдзельніцамі мерапрыемстваў, што ладзяцца ў аддзяленні дзённага знаходжання для інвалідаў ТЦСАН. Да старшыні апошняга Наталлі Мікалаеўны Глінскай далучыліся таксама актывісты Ушацкай раённай арганізацыі РГА “Белая Русь” (грамадскае аб’яднанне традыцыйна падтрымлівае інстытут сям’і і мацярынства). Як вынік – усе жанчыны атрымалі яшчэ большую порцыю віншаванняў і падарункаў. Сярод іх, дарэчы, прыгожыя скарбоначкі, вырабленыя непаўналетнімі інвалідамі Ушаччыны, а таксама жывыя кветкі, якія перадалі зямлячкам індывідуальныя прадпрымальніцы Таццяна Фралова і Таццяна Кандрацкая (магазіны “Букетніца” і “IVONA”).
Адмысловыя букеты – толькі не з кветак, а паветраных шароў – прымалі ў другой палове дня маладыя матулі Вераніка Анатольеўна Рэвенка, Наталля Аляксандраўна Жаваранак, Вольга Уладзіміраўна Арцямёнак. На выхаванні ў іх – дзеці з інваліднасцю малодшага ўзросту, а ў ліку “грамадскай нагрузкі” – удзел у рабоце клуба “Бацькоўскія ўніверсітэты”, што працуе на базе сацслужбы.
Да гэтых ушачанак з прыемнай місіяй завіталі прадстаўнікі аддзялення сацыяльнай адаптацыі і рэабілітацыі ТЦСАН, а таксама цэнтра банкаўскіх паслуг №237 ААТ “Белаграпрамбанк” у г.п.Ушачы.
– Няхай самыя добрыя словы ў ваш адрас гучаць пастаянна, а дзеці радуюць сваімі дасягненнямі, атульваюць клопатам і ўвагай, – уручаючы падарункі, жадала начальнік прыгаданай банкаўскай установы Дзіна Міхайлаўна Садоўская. – Жадаю моцнага здароўя, здзяйснення мар, цудоўнага настрою. Будзьце заўсёды шчаслівыя і любімыя!
– Канцэрт да Дня маці заўсёды збіраў поўную залу, сёлета, на жаль, у гэты дзень у нашых сценах было нязвыкла ціха, але мы таксама вырашылі павіншаваць некаторых матуль, сярод іх – актыўныя ўдзельніцы грамадскіх мерапрыемстваў, лаўрэаты абласной прэміі імя Зінаіды Тусналобавай-Марчанка, мнагадзетныя маці, – адзначыла дырэктар раённага цэнтра культуры і народнай творчасці Валянціна Уладзіміраўна Літвін.
Прыемны сюрпрыз у выглядзе кветак ручной работы і віншавальныя паштоўкі атрымалі, напрыклад, трэнер ДЮСШ і мнагадзетная мама Святлана Мікалаеўна Фядосенка, уладальніца ордэна Маці Таццяна Пятроўна Юркевіч.
Паштоўкі для любімых
Традыцыйна да Дня маці Федэрацыя прафсаюзаў Беларусі праводзіла акцыю “Павіншуем маму разам!” На працягу гэтага тыдня любы член прафсаюза ў спецыяльна арганізаваных зонах мог перадаць важныя словы для мамы ці бабулі праз адну з прапанаваных паштовак, бясплатна даслаўшы яе па патрэбным адрасе. Далучыліся да акцыі і актывісты раённай арганізацыі Беларускага прафсаюза работнікаў культуры, інфармацыі, спорту і турызму. У раённым цэнтры культуры і народнай творчасці, а таксама ў фізкультурна-аздараўленчым комплексе “Юнацтва-Ушачы” актыўна запаўнялі паштоўкі для мам.
К.КАВАЛЕЎСКАЯ,
В.КАМАРКОВА.
