З першым вераснёўскім дожджыкам сустрэлі Дзень ведаў школьнікі Ушаччыны. Аднак такая акалічнасць ні ім, ні бацькам, ні педагогам настрой не сапсавала. Восеньскія кроплі, упэўнены яны, – на добры пачатак спраў, на плённы новы навучальны год.
Урачыстасць ва Ушацкай школе, улічваючы няпростую эпідсітуацыю, праводзілася сёлета зноў у “скарочаным” фармаце – у фае навучальнай установы сабраліся толькі будучыя выпускнікі і першакласнікі. Дарэчы, не часта ўбачыш у адным месцы столькі галоўных віноўнікаў дзейства: упершыню селі за парты чатырох класаў ажно 99 хлопчыкаў і дзяўчынак. Крыху няёмка адчувалі сябе і 39 адзінаццацікласнікаў: гэта іх апошні Дзень ведаў.
Словы віншаванняў і найлепшыя пажаданні ў адрас педагогаў, вучняў прагучалі ў гэты дзень ад дырэктара Наталлі Васільеўны Стрыжонак, намесніка старшыні райвыканкама Дзмітрыя Пятровіча Цімафеева, іншых гасцей. З шыкоўным падарункам – вялікай турыстычнай палаткай і двума спальнымі мяшкамі – прыйшлі на ўрачыстасць прадстаўнікі Ушацкага лясгаса. Дарэчы, яго дырэктар Сяргей Аляксандравіч Даніловіч выканаў яшчэ адну прыемную місію: дзесяцікласнікам Арсенію Мацкевічу і Кірылу Апёнку, якія падчас летніх канікул у складзе студатрадаў усе тры змены шчыравалі ў лесапітомніку, уручыў персанальныя прэзенты. Божай дапамогі ва ўсіх справах пажадаў вучням і педагогам настаяцель прыхода храма святых пакутніц Мінадоры, Мітрадоры, Німфадоры г.п.Ушачы протаіерэй Вячаслаў Лобец, які адслужыў малебен на пачатак новага навучальнага года, акрапіў прысутных святой вадой.
Аб правілах бяспечных паводзін у школе і дома школьнікам нагадалі супрацоўнікі райаддзелаў міліцыі і па надзвычайных сітуацыях. Дарэчы, у гэты дзень праваахоўнікі пабывалі ва ўсіх установах адукацыі, у рамках рэспубліканскай акцыі “Увага – дзеці!” расказалі аб выпадках траўматызму непаўналетніх на дарозе, мерах прафілактыкі такіх здарэнняў.
Кранальнасці мерапрыемству надало выступленне самых маленькіх яго ўдзельнікаў: нясмела беручы ў рукі мікрафон, хлопчыкі і дзяўчынкі дзяліліся “грандыёзнымі” планамі на бліжэйшыя 11 гадоў навучання ў школе. Тыя ж, у каго гэты шлях хутка падыдзе да заканчэння, падтрымалі іх творча і падарункамі.
Напэўна, менш за ўсіх хваляваўся ў гэты дзень першакласнік Гардзей Кісель: побач былі не толькі мама з татам, але і старэйшы брат Антон, які сёлета заканчвае школу. А вось Назар Сакалоў і Ганна Навакрашчонава, наадварот, падчас лінейкі былі па-даросламу сур’ёзнымі і стрыманымі: іх чакала надзвычай адказная місія – разам з 11-класнікамі Ксеніяй Лапёнак і Аляксандрам Цімафеевым даць для ўстановы першы званок.
Стартаваў новы навучальны год урокам з гучнай тэмай “У адзінстве беларускага народа – аснова незалежнай краіны”. Для вучняў 6-11 класаў Ушацкай школы праходзіў ён у раённым цэнтры культуры і народнай творчасці. У цёплай атмасферы арганізатары мерапрыемства разам з юнакамі і дзяўчатамі высвятлялі сутнасць слова “адзінства”: патрыятызмам зараджаліся праз прагляд відэаролікаў пра старонкі гісторыі Беларусі, калі народ адзіным фронтам выступіў супраць ворага і абараняў сваю Радзіму.
Цёпла, прыгожа праходзіла свята першага званка і ў сельскіх школах. Так, у Глыбачанскую, у якой сёлета за парты селі 64 хлопчыкі і дзяўчынкі (яшчэ 14 наведваюць дашкольную групу), з віншаваннямі, словамі ўдзячнасці за годную падрыхтоўку да новага навучальнага завіталі старшыня райвыканкама У.Г.Аўдошка і начальнік аддзела па адукацыі М.В.Варава. У Ільюшыне, дзе сёлета не будзе 11 класа, галоўнымі віноўнікамі ўрачыстасці прадказальна сталі першакласнікі, якіх тут 7. У Вялікіх Дольцах, дзе гэтак жа няма старэйшых школьнікаў, віншаванні на працягу цэлага дня (ад правядзення ўрачыстасці з улікам эпідсітуацыі было вырашана адмовіцца) атрымлівалі найперш 8 хлопчыкаў і дзяўчынак, якія толькі пачынаюць сваё падарожжа па краіне ведаў. “Сённяшняй раніцай мой сынок Мікіта вельмі хваляваўся: ці добра выглядае касцюмчык, ці прыгожы букет – так марыў нарэшце сесці за парту! – прызналася мама першакласніка Паліна Бугаёва. – Хваляванне перадалося і мне, але ж я ўпэўнена, што ў руках вопытнай настаўніцы Галіны Васільеўны Пугач у яго ўсё атрымаецца!” А ў Арэхаўне ад традыцыі маштабна святкаваць 1 верасня адступаць не сталі, тым больш што гэтага чакалі як 6 першакласнікаў, так і 8 адзінаццацікласнікаў.
Кацярына КАВАЛЕЎСКАЯ.
