На мінулым пасяджэнні раённага выканаўчага камітэта былі разгледжаны вынікі работы сельскагаспадарчай галіны за 9 месяцаў. Са справаздачай выступіла В.Л.ХАМЁНАК, намеснік старшыні райсельгасхарча па эканоміцы.
Вытворчасць малака павялічылася на 2,6 працэнта, свініны – на 5,7, агародніны і кармоў – на 1,6, аднак знізілася вытворчасць ялавічыны на 0,2 працэнта. Пасяўныя плошчы пад зерневыя ўраджаю 2011 года павялічаны на 1546 гектараў, што склала 129 працэнтаў да ўзроўню адпаведнага перыяду 2009 года, азімага рапсу – на 470 гектараў.
За справаздачны перыяд дапушчана зніжэнне тэмпаў росту вытворчасці і не дасягнуты ўласны ўзровень папярэдняга года ў шасці сельскагаспадарчых арганізацыях раёна: “Дземенец-Агра” (95,8), “Ільюшынскі” (99,7), “Вялікадолецкае” (99,5), “Дубраўка” (89,1), “Арэхаўна” (93,1), “Райаграсервіс” – 98,8. Ва ўсіх гэтых гаспадарках знізіўся аб’ём раслінаводства, а ў трох апошніх і жывёлагадоўлі, вытворчасць малака на адну карову знізілася адпаведна на 645, 636 і 885 кілаграмаў.
Пастаянна вядзецца работа па павышэнні якасці рэалізоўваемай прадукцыі жывёлагадоўлі. Усе гаспадаркі, акрамя “Дземенца”, атрымалі сорт “экстра”, ім рэалізавана 9,3 працэнта малака. Больш за ўсіх прадало малака экстрай “Арэхаўна” – 24,5 працэнта, “Ільюшынскі” – 19,3, “Кублічы” – 10,8. Вышэйшым гатункам прададзена 53 працэнты, першым – 33. У кожнай гаспадарцы былі выпадкі продажу няякаснага малака – другім гатункам прададзена 5 працэнтаў ад здадзенага, самы вялікі аб’ём продажу такога малака ў “Вялікадолецкім” – 13,8 працэнта.
Надой на карову склаў 2428 кілаграмаў, што на 306 кілаграмаў меней узроўню 2009 года і толькі ў дзвюх гаспадарках больш мінулагодняга – “Агра-Селішча” на 228 кілаграмаў і “Вялікадолецкім” на 25. Самыя высокія прывагі буйной рагатай жывёлы па-ранейшаму ў “Райаграсервісе” – 758 грамаў, стабільныя яны і ў ПУП “Сарочына”, дзе займаюцца свінагадоўляй – 556 грамаў.
Недаатрымана прыплоду буйной рагатай жывёлы на 196 галоў. Гэта асноўная прычына зніжэння валавой прадукцыі. Толькі чатыры гаспадаркі працуюць як след па асемяненні жывёлы і маюць вынікі, у “Райаграсервісе” атрымана на 134 галавы больш, у “Глыбачанах” – на 72, “Вялікадолецкім” – на 30 галоў і “Агра-Селішча” – на 12.
Гаспадаркамі нарыхтавана дастатковая колькасць кармоў – 29,7 цэнтнера кармавых адзінак на ўмоўную галаву жывёлы, неабходна толькі наладзіць паўнацэннае кармленне.
Валавы збор зерневых склаў 21595 тон, або 77 працэнтаў да ўзроўню мінулага года, сярэдняя ўраджайнасць – 17,9, рапсу толькі 5,1 цэнтнера з гектара.
Выручка ад рэалізацыі прадукцыі, работ і паслуг склала 32,3 мільярда, рост – 41,5 працэнта да ўзроўню 2009 года. Сабекошт тоны малака склаў 683 тысячы, у сярэднім па раёне ад кожнай тоны атрымана 166 тысяч рублёў прыбытку. Па ранейшаму самыя вялікія страты з-за продажу малака нізкай якасці – 584 мільёны рублёў: “Вялікадолецкім” – 130 мільёнаў, “Арэхаўне” – 110, “Райаграсервісе” – 84, “Кублічах” – 74,5. Акрамя гэтага страты ад ялавасці кароў склалі 477 мільёнаў. Расход кармоў на адну тону малака склаў 1,22 тоны кармавых адзінак, у “Арэхаўне” гэты паказчык вышэй на 0,4 тоны, “Вялікадолецкім” – на 0,3 (норма 1,0-1,2). Расход кармоў на вытворчасць тоны ялавічыны склаў 12,03 тоны, але ў “Ільюшынскім”, “Дубраўцы” і “Вялікадолецкім” ён па 15,2 тоны. У цэлым па раёне ад рэалізацыі прадукцыі атрымана 1586 мільёнаў страт. Рэнтабельнасць мінус 8,3 працэнта. Аднак з улікам атрыманых бюджэтным сродкаў усе гаспадаркі маюць станоўчы вынік і чысты прыбытак. Выручка на аднаго працуючага ад рэалізацыі прадукцыі – 19,4 мільёна. Сярэднямесячная зарплата склала 678,9 тысячы рублёў, у верасні 759,3. Даведзенае заданне па росце заработнай платы не выканана на 15 працэнтаў, павышанае – на 34. Аднак рост зарплаты напрамую залежыць ад вытворчасці прадукцыі, якую неабходна нарошчваць. Павелічэнне прадукцыі жывёлагадоўлі плануецца атрымаць за кошт збалансаванага і якаснага кармлення жывёлы, неабходна наладзіць работу па асемяненні матачнага пагалоўя. Па папярэдняй ацэнцы работы дзесяці месяцаў рост вытворчасці складзе 101,3 працэнта.
