Будынак аптэкі і раней ніяк не пагаршаў панарамы цэнтра Ушач. Ну а зараз, пасля капітальнага рамонту з элементамі мадэрнізацыі і добраўпарадкавання прылеглай тэрыторыі і ўвогуле будзе ўпрыгожаннем гарпасёлка.
Праўда, у сувязі з гэтым ушачанам давялося сутыкнуцца з некаторымі нязручнасцямі, бо лекі часова адпускаліся з тыльнага ўваходу. Ад асобных людзей можна было нават пачуць заўвагі аб несвоечасовасці рамонту, які прыйшоўся на час павышанай захваральнасці. А таму менавіта з абмеркавання гэтага аспекту пачалася наша размова з загадчыкам установы І.М.Жынь.
– Віцебскае УП “Фармацыя” складае папярэдні план, адпаведна якому мадэрнізуюцца аптэкі сеткі. Сёлета, нарэшце, дайшла чарга да нас, – расказвае Ірына Мікалаеўна. – Хачу падкрэсліць, што абноўленая аптэка (а ў нас не толькі адрамантаваны будынак, а і ўстаноўлена сучаснае гандлёвае абсталяванне) будзе абслугоўваць кліентаў больш хутка і якасна. Уявіце сабе, што старыя вітрыны і шафы ўладкоўваліся 15 год таму, калі колькасць найменняў лекавых сродкаў і тавараў аптэчнага асартыменту была ў пяць разоў меншай за цяперашнюю. Адпаведна, вялікая іх частка знаходзілася не ў гандлёвай зале, а ў іншых памяшканнях і аптэкарам пастаянна даводзілася адлучацца ў пошуку чарговага прэпарата, што замаруджвала абслугоўванне.
– Розніца сапраўды прыкметная! – далучаецца да размовы фармацэўт-рэцэптар Наталля Касяк (на здымку). – Новыя шафы вялікія і ўмяшчальныя, літаральна ўсё пад рукамі. Так што працаваць цяпер будзем больш прадуктыўна і, хочацца спадзявацца, зменшым час чакання для нашых шаноўных кліентаў.
Вядома ж, пацікавіліся мы і меркаваннямі апошніх.
– Аптэка зусім не адрозніваецца ад сталічных. Прыгожа, акуратна, вітрыны падсвечаны, усё добра бачна. Нам падабаецца!” – вынеслі вердыкт жыхары Мінска Максім Новікаў і Юлія Ільіна, якія прыехалі на малую радзіму да бацькоў.
Трэба сказаць, што капітальны рамонт праводзіцца ў максімальна сціслыя тэрміны – распачаўся ён у сярэдзіне верасня, а зараз гандлёвая зала ўжо працуе ў штатным рэжыме (з 8.00 да 20.00 па буднях і з 8.00 да 18.00 – па выхадных). “Стараліся скараціць час работ, іншы раз працавалі і звышурочна, бо разумелі, што аб’ект запатрабаваны”, – падзяліўся з намі цясляр Сяргей Князеў. Дарэчы, прадпрыемства “СаюзДзвінБуд”, якое выйграла тэндар на правядзенне работ, працуе ва Ушачах неўпершыню: два гады таму рыхтавала да адкрыцця аптэку, што размешчана ў будынку рэдакцыі. Зараз рабочыя наводзяць апошнія штрыхі ў кабінетах і звонку: аптэку ўпрыгожылі новы казырок і ганак, зручны пандус, ля ўваходу ўстановяць лавачку, уладкуюць паркоўку для веласіпедаў, пасадзяць туі. Адным словам, усё будзе на належным узроўні, які ўласцівы ўстановам буйнейшай беларускай аптэчнай сеткі.
Наталля БАГДАНОВІЧ.
