На “прамую лінію”, якую ў рэдакцыі праводзіў начальнік Ушацкага раёна газазабеспячэння ВУ “Полацкгаз” Яўген Сяргеевіч Шчасны, паступіла некалькі пытанняў. Мяркуем, што адказы на іх будуць цікавымі многім спажыўцам газу.
– Тэрмін службы маёй газавай пліты 10 гадоў, у эксплуатацыі яна 8. Наколькі можа быць падоўжаны час яе карыстання пры дыягностыцы і ў якую суму яна абыдзецца?
– Згодна Правілаў карыстання газам у быце, па заканчэнні нарматыўнага тэрміну эксплуатацыі газавай пліты (ён пазначаны ў дакументах да абсталявання) спажывец газу абавязаны замяніць пліту або заключыць дагавор з газавай службай на правядзенне дыягностыкі яе тэхнічнага стану для вызначэння рэшткавага рэсурсу і магчымасці далейшай эксплуатацыі. Па выніках першай дыягностыкі тэрмін службы можа быць падоўжаны на перыяд да 4-х гадоў. Далейшая эксплуатацыя пліт, якія выпрацавалі нарматыўны і дазволены тэрмін эксплуатацыі па выніках першай дыягностыкі, дапускаецца па выніках паўторнай на перыяд да 3-х гадоў. У выпадку адсутнасці тэхнічнай магчымасці ліквідацыі няспраўнасцей у гэты перыяд, пліта падлягае вываду з эксплуатацыі да заканчэння ўстаноўленага па выніках дыягностыкі тэрміну. Гранічны перыяд далейшай эксплуатацыі пліт, якія выпрацавалі нарматыўны тэрмін, не павінен перавышаць 10 гадоў. Правядзенне ж дыягностыкі каштуе 19 рублёў 74 капейкі. Зразумела, што калі неабходна замена запчастак, то сума павялічыцца.
– Жывём з мужам у доме, дзе зарэгістраваны толькі ён. Ліміт газу ў балонах, які адпускаецца па льготнай цане, ужо выбралі. На той жа вуліцы размешчана мая сядзіба і сваю “порцыю” я наогул не выкарыстоўвала. На льготы ў такім выпадку мы можам разлічваць?
– Каб разлічваць на льготную цану, вам трэба зарэгістравацца разам з мужам, бо згодна Палажэння аб парадку разлікаў і ўнясення платы за камунальныя паслугі і платы за карыстанне жылымі памяшканнямі, па субсідзіраваных цэнах адпускаецца да 5 балонаў (50 літраў) уключна на кожнага грамадзяніна, зарэгістраванага ў жылым памяшканні. Калі спажывец выкарыстоўвае звыш 5 балонаў на кожнага грамадзяніна – то па цэнах, якія забяспечваюць поўнае пакрыццё выдаткаў на аказанне паслуг па забеспячэнні звадкаваным газам ад індывідуальнай балоннай устаноўкі.
– Раён газазабеспячэння рэалізуе насельніцтву газавыя катлы толькі маркі “Гефест”? І ці можна набыць абсталяванне ў растэрміноўку, пакупка ж нятанная?
– Рэалізуем спажыўцам прыроднага газу катлы розных марак, якія прывозяцца пад заказ. Набыць кацёл можна ў растэрміноўку ад 6 да 9 месяцаў. Больш падрабязную інфармацыю пра рэалізацыю газавага абсталявання можна атрымаць, звярнуўшыся непасрэдна да нас на прадпрыемства або па тэлефоне 5-71-04.
Падрыхтавала Вольга КАМАРКОВА.
