З 10 сакавіка ў Беларусі пачаўся вясенні сезон палявання на птушыную дзічыну. Паляванне на гусей і качароў качак дазваляецца ў светлы час сутак, акрамя перыяду з 11 да 18 гадзін. Агульная працягласць веснавога сезона палявання не можа перавышаць чатырох тыдняў (28 каляндарных дзён) запар у прадугледжаным правіламі дыяпазоне (у 2018 годзе – з 10 сакавіка па 13 мая). Канкрэтныя тэрміны ўстанаўліваюцца рашэннямі карыстальнікаў паляўнічых угоддзяў. Дазволеныя спосабы палявання на гусей – з засады толькі са схованкі, на качароў качак – яшчэ і з падманьваннем, выкарыстоўваючы падсадных качак, чучалы, манкі. Схованка – гэта асобнае (адасобленае) сховішча, якое забяспечвае маскіроўку паляўнічага не менш чым з двух бакоў. У выпадку неабходнасці дабору параненага гусака паляўнічы можа пакінуць схованку з расчахлёнай паляўнічай зброяй і ажыццяўляць дабор падранка гусака па-за схованкай на адлегласці не больш за 300 м ад яе. Пры гэтым выкарыстоўваць зброю дазволена толькі для дабору дадзенага падранка.
Падчас палявання на гусей дапускаецца выкарыстанне падсадных жывёл, чучалаў, манкоў і іншых сродкаў падманьвання паляўнічых жывёл без абмежаванняў. Пры паляванні на качароў качак падманьванне абавязкова. Для гэтага можна выкарыстоўваць падсадную качку, пудзіла і манок. Дапускаецца выкарыстанне падсадной качкі адначасова з пудзіламі і (або) манком. У той жа час прымяненне толькі вабіка без чучала або чучала без вабіка не дапускаецца. Можна здабываць толькі падляцеўшых ці падсеўшых да падсадной качкі або чучала качароў.
Прадугледжана прымяненне гладкаствольнай паляўнічай зброі і патронаў, начыненых шротам. Пры перамяшчэнні да месца палявання і назад, а таксама ў забаронены час зброя павінна быць разраджана і знаходзіцца ў чахле. Для вышуку і падачы здабытай дзічыны можна выкарыстоўваць паляўнічых сабак: тэр’ераў, такс, лягавых, спаніэляў, рэтрывераў, водных сабак. Можна скарыстацца маламернымі суднамі без рухавікоў для ўстаноўкі чучалаў (падсадных качак) і падняцця здабытай дзічыны.
А.ТАНАНА, старшы дзяржінспектар Полацкай міжраённай інспекцыі аховы расліннага і жывёльнага свету.
