Трапны лозунг савецкіх часоў “Кадры вырашаюць усё” застаецца актуальным і зараз – менавіта ад людзей, што задзейнічаны ў стварэнні матэрыяльных і духоўных каштоўнасцяў, залежыць паспяховасць развіцця рэгіёна. У нашым раёне зацверджана сістэма мер па належным кадравым забеспячэнні арганізацый галін эканомікі і сацыяльнай сферы. Пра тое, як яна выконваецца, ішла размова на пасяджэнні райвыканкама, што адбылося на мінулым тыдні. Прыгаданая сістэма ўключае ў сябе пяць ключавых напрамкаў, вынікі дзейнасці па якіх былі прааналізаваны ў выступленнях намесніка старшыні райвыканкама Н.М.Марковіч, начальніка ўпраўлення па працы, занятасці і сацыяльнай абароне насельніцтва райвыканкама С.П.Васілеўскай, начальніка аддзела ідэалагічнай работы, культуры і па справах моладзі С.В.Азевіч, начальніка аддзела арганізацыйна-кадравай работы В.М.Шахноўскай. У абмеркаванні тэмы прынялі ўдзел намеснік начальніка ўпраўлення арганізацыйна-метадычнага і прававога забеспячэння кадравай работы галоўнага ўпраўлення кадравай палітыкі Адміністрацыі Прэзідэнта Рэспублікі Беларусь Аляксей Уладзіміравіч Гуйда, намеснік начальніка галоўнага ўпраўлення арганізацыйна-кадравай работы – начальнік аддзела па рабоце з кадрамі Віцебскага аблвыканкама Уладзімір Мікалаевіч Давыдоўскі.
Захоўваць баланс
Прагназаванне патрэбнасці ў працоўных рэсурсах, збалансаванасць попыту і прапанавання – неабходныя складнікі належнага кадравага забеспячэння. Гэта тым больш важна, бо дэмаграфічная сітуацыя ў нашым раёне застаецца няпростай. Па даных на 1 студзеня бягучага года, на Ушаччыне пражывала 13463 чалавекі, што на 342 менш у параўнанні з 2016-м. Зменшылася і колькасць працаздольнага насельніцтва – з 50,3 працэнта ў 2016 да 49,5 у бягучым годзе. А вось людзей працаздольнага ўзросту, занятых у эканоміцы, стала больш. Па стане на 1 кастрычніка, маюць работу 5532 ушачаніны ці 83 працэнты працаздольных жыхароў (год таму было 5401 чалавек ці 77,8 працэнта). Ва ўпраўленне па працы, занятасці і сацыяльнай абароне насельніцтва райвыканкама за 9 месяцаў бягучага года па пытаннях працаўладкавання звярнулася 250 чалавек (год таму – 296), для 172 грамадзян гэта праблема вырашана станоўча. Зменшылася сёлета і колькасць зарэгістраваных беспрацоўных – 181 чалавек, ці 0,7 працэнта да колькасці эканамічна актыўнага насельніцтва (летась – 204 ці 0,9 працэнта). Што датычыцца галін эканомікі, то дэфіцыт кадраў мае на цяперашні час лясная і сельская гаспадарка (90,1 і 95,8 працэнта адпаведна), будаўніцтва (94) і медыцына (93,2), што сведчыць аб недастатковай рабоце кіраўнікоў і кадравікоў адпаведных арганізацый па запаўненні вакансій, прагназаванні патрэбнасці ў кадрах.
У арганізацыях раёна зараз маецца 105 вакансій, і 77 працэнтаў з іх патрабуюць наяўнасці ў спецыялістаў вышэйшай і сярэдняй адукацыі – урача, заатэхніка, агранома і інш. На ўліку ў службе занятасці ў цяперашні час 37 беспрацоўных, якія ў асноўным не маюць спецыяльнай адукацыі.
Стаўка – на моладзь
Важны напрамак кадравага забеспячэння – прафарыентацыйная работа з будучымі выпускнікамі школ. Ва ўсіх навучальных установах раёна праводзяцца адпаведныя мерапрыемствы, аднак сёлета прафарыентацыйная работа чакаемых вынікаў не дала. Так, з 94 выпускнікоў у навучальныя ўстановы запатрабаванага ў раёне сельскагаспадарчага і медыцынскага профілю паступілі па 4 чалавекі. А вось з 43 выпускнікоў 9-х класаў сельскагаспадарчым спецыяльнасцям зараз вучацца 10.
У арганізацыях раёна практыкуецца мэтавая падрыхтоўка кадраў. Сёлета заключана 22 мэтавыя дагаворы: з іх 12 – райсельгасхарчам, 7 – райспажыўтаварыствам, па адным – ЦРБ, ПМК-66 і ААТ “Ільюшынскі”. Накіраванняў выдавалася больш, аднак выпускнікі па розных прычынах не паступілі ў навучальныя ўстановы. Відавочна, што гэты напрамак кіраўнікам арганізацый трэба выкарыстоўваць больш актыўна.
Важнейшым фактарам рашэння кадравай праблемы з’яўляецца замацаванне ў раёне маладых спецыялістаў. Летась іх прыбыло 65, і ў цяперашні час працуе 40. Сёлета на Ушаччыну размеркавана 79 чалавек, з іх 17 – у сельгасарганізацыі, 16 – у ЦРБ, 10 – у гандаль, па 8 – у сферы адукацыі і культуры, 7 – у лясную гаспадарку, 5 – у будаўніцтва. За прайшоўшыя тры месяцы 2 пераразмеркаваліся і столькі ж прызваны на вайсковую службу. 50 працэнтаў маладых спецыялістаў, якія былі размеркаваны ў 2015 годзе, засталіся на гэты час працаваць у раёне. І гэты паказчык сёлета вышэйшы, чым у некалькі папярэдніх гадоў. Найбольшы працэнт замацаванасці ў сферах гандлю і адукацыі (75), культуры (67), аховы здароўя (64), найменшы – у будаўніцтве (14) і сельскай гаспадарцы (27), што ў асноўным абумоўлена складаным эканамічным становішчам арганізацый.
Старшыня райвыканкама У.Г.Аўдошка падкрэсліў ключавую ролю кіраўнікоў арганізацый у замацаванні маладых спецыялістаў, якія павінны не толькі прадаставіць работу, але і паспрыяць у вырашэнні бытавых пытанняў, разгледзець магчымасць кар’ернага росту моладзі.
Расці прафесійна
Павышэнне кваліфікацыі спецыялістаў, работа з рэзервам кадраў – абавязковае патрабаванне сучаснай эканомікі.
За 9 месяцаў года павысілі сваю кваліфікацыю на курсах 182 чалавекі. Пытанні з выкананнем планаў па гэтым аспекце (з-за адсутнасці сродкаў) маюць толькі арганізацыі сельскай і лясной гаспадаркі. Рэгулярна праводзіцца вучоба спецыялістаў на галіновых семінарах. 18 работнікаў павышаюць свой узровень, атрымліваючы вышэйшую адукацыю. Разам з тым, маюцца факты, калі работнікі, што займаюць кіруючыя пасады, не маюць адпаведнага адукацыйнага ўзроўню.
Работа з рэзервам кадраў – напрамак, ад якога напрамую залежыць бліжэйшая будучыня раёна. Зараз у кадравым рэзерве райвыканкама знаходзіцца 172 чалавекі, 142 з іх – на канкрэтныя пасады. Чацвёра нашых спецыялістаў уваходзяць у кадравы рэзерв аблвыканкама. Разам з тым, работа па фарміраванні рэзерву кадраў павінна весціся больш эфектыўна і мэтанакіравана.
* * *
Як адзначылі А.У.Гуйда і У.М.Давыдоўскі, работа па кадравым забеспячэнні не заўсёды прыкметная, але надзвычай неабходная. Яна абавязкова павінна быць напоўнена канкрэтыкай, весціся сістэмна, прадумана, агульнымі намаганнямі ўсіх зацікаўленых суб’ектаў.
Наталля БАГДАНОВІЧ.
