Каманды органаў дзяржкіравання Віцебскай вобласці на працягу двух дзён змагаліся за чэмпіёнскія званні на трэцяй летняй спартакіядзе, якая прайшла на базе лагера “Дружба” ў Шумілінскім раёне.
Адкрываючы ўжо традыцыйны спартыўна-турыстычны злёт, губернатар вобласці Мікалай Мікалаевіч Шарснёў падкрэсліў, што мэта падобных мерапрыемстваў – не толькі заахвоціць работнікаў дзяржкіравання заняткамі спортам, а і паказаць насельніцтву добры прыклад здаровага ладу жыцця. Такія спаборніцтвы сталі ўжо своеасаблівай фішкай нашай вобласці, і сур’ёзную планку вынікаў устанаўлівае сам губернатар, які ўдзельнічаў у сілавых відах спорту. Сярод 27 каманд раёнаў вобласці і адміністрацый Віцебска былі і ўшачане, якія мерыліся сіламі з калегамі ў розных дысцыплінах праграмы.
Спартыўным запалам натхняў сяброў па камандзе яе капітан – старшыня райвыканкама Уладзімір Генадзьевіч Аўдошка, які прымаў удзел у спаборніцтвах па стральбе, бадмінтоне, футболе і падыманні гіры. У.Г.Аўдошка, выбіўшы 45 ачкоў з 50-ці магчымых, заняў другое месца. І калі стральба для яго не новы від спорту, то ў спаборніцтвах па бадмінтоне старшыня ўдзельнічаў упершыню і дэбют удаўся – 8 месца. Ніколькі не сумняваліся ўдзельнікі нашай каманды, што ўдала Уладзімір Генадзьевіч выступіць у падыманні гіры, бо прыхільнікам гэтага віду спорту ён з’яўляецца вельмі даўно, і не памыліліся: 35 ачкоў прынеслі 4 месца. Перамогу ж у гэтым практыкаванні прадказальна заваяваў старшыня аблвыканкама М.М.Шарснёў. У яшчэ адным сілавым відзе спорту – жыме штангі лежачы – Ушаччыну прадставіў старшыня Вялікадолецкага сельвыканкама Алег Леанідавіч Сыс (на здымку), з вынікам у 120 кілаграмаў ён заняў 7 месца. Майстар-клас у гэтым відзе ўсім прысутным паказаў губернатар, адціснуўшы штангу вагой 167,5 кілаграма, што да гэтага часу не ўдавалася ні аднаму спартсмену ў яго ўзроставай катэгорыі. Але і на гэтым старшыня аблвыканкама не спыніўся, і пад авацыі гледачоў устанавіў новы рэкорд Беларусі сярод 50-59-гадовых атлетаў: адціснуў 170 кілаграмовую штангу.
Дастойна выглядалі нашы землякі ў турніры па шашках, дзе гонар раёна адстойвалі загадчык юрыдычнага сектара Ганна Генадзьеўна Кандрацкая і кіраўнік справамі райвыканкама Ігар Пятровіч Шышко, які заняў трэцяе месца (на здымку).
Вядома ж, турыстычны злёт нельга ўявіць без валейбольных баталій, дзе раён прадставіла каманда ў складзе бухгалтара райвыканкама Аляксея Казлоўскага, галоўнага спецыяліста аддзела ідэалагічнай работы, культуры і па справах моладзі райвыканкама Ірыны Бельскай, кіраўніка справамі Вяркудскага сельвыканкама Сяргея Гарбачова і прадстаўніка зямельнай службы Дзмітрыя Баратынскага. Але ў напружанай барацьбе з мінімальным адрывам нашы валейбалісты ўступілі дубровенскім калегам і падняцца на верхнія радкі турнірнай табліцы не змаглі. У снайперскім турніры выступала таксама галоўны спецыяліст кіравання справамі райвыканкама Святлана Леанідаўна Дулуб. Галоўны спецыяліст райсельгасхарча Святлана Акулёнак і выконваючы абавязкі старшыні Ушацкага сельвыканкама Міхаіл Хоміч змагаліся ў настольным тэнісе, а юрысконсульт райвыканкама Алена Карчэска і бухгалтар Аляксей Казлоўскі зараблялі ачкі ў агульную скарбонку каманды ў лёгкай атлетыцы. Алена Карчэска разам з галоўным спецыялістам райсельгасхарча Аляксеем Клопавым увайшлі ў тройку лепшых у пазаконкурсных спаборніцтвах на трапнасць і спрыт.
Асабліва гарачым падчас спартакіяды стаў таварыскі футбольны матч “Усход-Захад”, у якім паміж сабой спаборнічалі зборныя старшынь гар- і райвыканкамаў усходніх і заходніх раёнаў вобласці.
У выніковым пратаколе спаборніцтваў першае месца, як і ў мінулым годзе, дасталася дружыне аблвыканкама. Наша зборная размясцілася ў сярэдзіне турнірнай табліцы – на 13-м месцы, пры гэтым узняўшыся на некалькі прыступак уверх у параўнанні з папярэдняй спартакіядай. Спыняцца на дасягнутым нашы ўдзельнікі не збіраюцца, бо маюць добрыя рэзервы ў асобных відах. І хоць галоўны прынцып аматарскага спорту – перавагу ўдзелу над перамогай – ніхто не адмяняў, імкнуцца да найлепшых вынікаў кіраўнікі павінны як у спартыўных турнірах, так і на сваіх працоўных месцах.
Вольга КАМАРКОВА.
