Каля тысячы школьнікаў Прыдзвіння ўдастоены права пабываць на галоўнай ёлцы рэгіёну, якая праходзіць сёння ў канцэртнай зале “Віцебск”. Гэтае маштабнае мерапрыемства даўно стала традыцыйным і вельмі папулярным у дзяцей. На яго запрашаюцца выдатнікі вучобы, пераможцы алімпіяд і творчых конкурсаў, спартыўных спаборніцтваў, дзеці з мнагадзетных і малазабяспечаных сямей.
Прыемна, што сёлета сярод удзельнікаў свята – 25 хлопчыкаў і дзяўчынак з нашага раёна. У Віцебск ушацкая дэлегацыя прыбыла на дзень раней і адразу ж акунулася ў незвычайную казачную атмасферу – далучылася да пазнавальнай экскурсіі па абласным цэнтры, палюбавалася яго вячэрнімі краявідамі і цікавым навагоднім дзействам на гарадской плошчы.
Сёння ж маленькіх гасцей з усіх куточкаў Віцебшчыны збярэ вакол сябе галоўная абласная ёлка. Са словамі віншавання перад прысутнымі выступіць старшыня аблвыканкама Мікалай Мікалаевіч Шарснёў. Безумоўна, не абыдзецца ў гэты дзень без падарункаў, карагодаў, вясёлых гульняў і конкурсаў.
Кацярына КАВАЛЕЎСКАЯ.
