Незвычайная бярозка прыцягвала ўвагу многіх на вяркудскім падворку падчас святкавання Дня Перамогі ва Ушачах. Незвычайнасць яе была ў тым, што акрамя лісточкаў на ёй развіваліся і рознакаляровыя стужкі. Настаўнікі і вучні Вяркудскай школы прапаноўвалі ўдзельнікам свята ўшанаваць памяць сваіх родных, тых, хто ўдзельнічаў у Вялікай Айчыннай вайне. Для гэтага трэба было напісаць на стужцы іх імёны і прозвішчы і замацаваць на галінках дрэва. Паступова стужак на бярозцы станавілася ўсё больш і больш…
Такую цікавую ідэю прыдумалі ў Вяркудскай школе. Наведваючы на пачатку новага навучальнага года ўстанову, не маглі не пацікавіцца лёсам гэтага “новаўвядзення”. Трэба адзначыць, што школа з’яўляецца інавацыйнай пляцоўкай па рэалізацыі абласнога праекта грамадзянска-патрыятычнага выхавання школьнікаў, а таму натуральна, што патрыятычная работа павінна быць арганізавана на высокім узроўні, з новымі формамі, метадамі, ідэямі. Не так даўно ў школе стварылі гісторыка-краязнаўчы пакой.
– Менавіта пакой, бо да музея нам яшчэ трэба шмат расці і нямала працаваць, але ж не ўсё робіцца ў адзін момант, – падкрэслівае намеснік дырэктара па асноўнай дзейнасці Галіна Васільеўна Казлова.
Цяперашні пакой, а ў будучым – музей, мае тры аддзяленні – Ушаччына паэтычная, партызанская, гераічная. Зразумела, што ў паэтычнай частцы сабраны матэрыялы пра нашых знакамітых землякоўпісьменнікаў. Нямала сваіх герояў мае слаўная Ушаччына – аб гэтым сведчыць і адпаведны куток, дзе асобнае месца займае тэма інтэрнацыянальнага доўгу. Тым больш што ў школе працуюць настаўнікамі воіныінтэрнацыяналісты М.Р.Джураеў і У.У.Друкчэнка, якія праводзяць цікавыя сустрэчы з вучнямі.
Праекты, даследчыя работы, акцыі, звесткі пра ветэранаў Вяркудскага сельсавета і многае іншае сабрана ў раздзеле, прысвечаным Вялікай Айчыннай вайне. Менавіта тут пачэснае месца заняла і прыгаданая бярозка памяці. Як расказала Галіна Васільеўна, гэтая ідэя належыць настаўніцы Таццяне Уладзіміраўне Ліленка. Яе адразу падтрымалі ўсе педагогі і вучні, якія з задавальненнем пакідалі запісы на стужках. Пасвойму сімвалічна, што спачатку дрэўца было з зялёнымі лісточкамі, якія сімвалізуюць маладосць і сілу, зараз жа на ім рознакаляровыя яркія стужкі – родныя жывуць у сэрцы і памяці яркім успамінам. Сярод тых, хто пакінуў свае запісы на бярозцы памяці, заслужаны архітэктар Беларусі, адзін з аўтараў мемарыяльнага комплексу “Прарыў” Юрый Міхайлавіч Градаў, кіраўнік нашага раёна Віктар Віктаравіч Родзіч. У школе ўпэўнены, што бярозка памяці яшчэ папоўніцца, бо вайна закранула практычна кожную беларускую сям’ю.
Вольга КАМАРКОВА.
На здымку: Г.В.Казлова ў гісторыка-краязнаўчым пакоі.
