Працягваецца ягадна-грыбны сезон. І таму звяртаем увагу аматараў ціхага палявання, што ў бягучым годзе пачасціліся выпадкі знікнення грамадзян падчас паходаў за дарамі прыроды. Хтосьці, паблукаўшы 23 гадзіны, знаходзіць дарогу да дома самастойна, а кагосьці даводзіцца шукаць усім светам: лес прачэсваюць і міліцыя, і выратавальнікі, і леснікі, і жыхары навакольных вёсак. Зрэшты, заблукаць можа кожны, але часцей за ўсё праблемы з арыентаваннем узнікаюць у людзей сталага ўзросту.
Апошні выпадак у нашым раёне адбыўся не так даўно. У раённы аддзел унутраных спраў патэлефанавала жанчына, якая паведаміла, што яе муж, прыехаўшы з горада на дачу ў Воцькавічы, адправіўся ў лес і дадому пад вечар не вярнуўся. Сітуацыя ўскладнялася тым, што пенсіянер меў праблемы з каленным суставам. Выехаўшыя на месца здарэння супрацоўнікі міліцыі даволі хутка ўстанавілі сувязь са згубіўшымся па мабільным тэлефоне. На шчасце, з пенсіянерам нічога не здарылася – не рызыкуючы з хворай нагой ісці па цемры, ён рыхтаваўся да начлегу ў лесе. Аказваецца, за няўдалы паход мужчына зблудзіў двойчы – першы раз выбіўся да Бычкоў, але па дарозе вяртацца ў родную вёску не стаў. Зарыентаваўшыся на мясцовасці, вырашыў ісці напрамкі і… зноў заблукаў.
На гэтым прыкладзе бачна, як важна ў лесе мець з сабой мабільны тэлефон. Зараз ён не з’яўляецца прадметам раскошы і маецца ў большасці пажылых людзей. Вось толькі не кожны бярэ яго з сабой, маўляў “дзеці падарылі, а я яшчэ згублю!”. А ўзяць трэба абавязкова, папоўніўшы баланс і зарадзіўшы акумулятар. Нярэдка ў паход па ягадыгрыбы грамадзяне апранаюцца так, нібы збіраюцца там партызаніць. Камуфляж надзейна маскіруе чалавека, што значна ўскладняе пошукі. Вядома, адзенне павінна быць шчыльным, але лепш – яркім. Для таго каб не згубіцца, калі вы ідзяце кампаніяй, можна скарыстацца свістком. Яго гук чутны за 23 кіламетры.
Правільна паступіў мужчына, застаўшыся ў лесе ў чаканні светлага часу сутак: пачынае цямнець — лепш займіцеся падрыхтоўкай месца для начлегу.
Калі чалавек не вярнуўся з лесу, паведамляйце аб здарэнні ў міліцыю. Пры неабходнасці міліцыянеры прыцягнуць да пошукаў кінолагаў, выратавальнікаў, неабходную тэхніку, бо ў такой сітуацыі дарагая кожная гадзіна. Не адкладвайце званок надоўга, каб потым не было позна.
Л.Клачок, начальнік аддзялення крымінальнага вышуку Ушацкага РАУС.
