Сёлетні Дзень ведаў на радасць школьнікам, іх бацькам і настаўнікам выдаўся надзвычай светлым і ўзнёслым. Яшчэ адорвала цеплынёй асенняе сонейка, а будні дзень не перашкодзіў родным і блізкім вучняў раздзяліць з імі знакавую падзею. Цікавы, насычаны новымі сустрэчамі, марамі і надзеямі свет ведаў у гэты чацвер упершыню расчыніў дзверы для 122 хлопчыкаў і дзяўчынак Ушаччыны. Усяго ж за парты ў раёне сёлета селі 1256 школьнікаў.
Свята першага званка ва Ушацкай школе хоць і праходзіла на звыклым месцы, аднак стварыла для ўсіх яго ўдзельнікаў асаблівы настрой. На цэнтральнай плошчы гарпасёлка, якая ў апошні час набыла абсалютна новы выгляд, сабралася нямала народу. І вельмі прыемна, што менавіта падчас гэтай урачыстасці на ўстаноўленым днямі флагштоку ўпершыню быў узняты дзяржаўны сцяг Рэспублікі Беларусь. Патрыятычныя матывы прысутнічалі і ў іншых дэталях. Так, напрыклад, пасля заканчэння лінейкі самыя маленькія школьнікі і вучні 11 класаў па добрай традыцыі ўсклалі кветкі да помніка загінуўшым воінам і партызанам. А гэта, безумоўна, дастойны прыклад паважлівых адносін да гісторыі, пераемнасці пакаленняў.
Раздзяліць з калектывам Ушацкай школы свята прыйшло ў гэты дзень нямала гасцей. Звяртаючыся да прысутных, старшыня райвыканкама В.В.Родзіч адзначыў, што і раённая ўлада, і педагагічныя калектывы, і бацькоўскія камітэты робяць усё магчымае, каб дзеці ў камфортных умовах, утульных класах атрымлівалі веды, умацоўвалі здароўе. Віктар Віктаравіч пажадаў школьнікам выдатнага настрою і высокіх адзнак, будучым выпускнікам – добра падрыхтавацца да экзаменаў, настаўнікам – поспехаў, а бацькам – цярпення.
Шмат у гэты дзень было віншаванняў, цёплых слоў і падарункаў ад прадстаўнікоў лясгаса, прамкамбіната, ПМС, ДРБУ-105, райаддзелаў міліцыі і па надзвычайных сітуацыях.
Запамінальна праходзіла свята першага званка ў Глыбачанскай школе. Павіншаваць вучняў з пачаткам новага навучальнага года, даць наказ быць годнымі грамадзянамі сваёй краіны завітаў на мерапрыемства часты госць установы Дзям’ян Уладзіміравіч Крупеня. Ветэран Вялікай Айчыннай вайны, а таксама прадстаўнікі райвыканкама, сельскага Савета дэпутатаў, КУСГП “Глыбачаны” і іншых арганізацый раёна разам з дружным калектывам альмаматэр парадаваліся хоць і нязначнаму, ды ўсё ж павелічэнню колькасці навучэнцаў. Так, сёлета за парты тут селі 52 вучні (летась было 51). “Ну а наконт колькасці дашкольнікаў, дык увогуле сітуацыя выдатная! – расказвае дырэктар установы Віктар Пятровіч Котаў. – Сёлета ў дзіцячы садок прыйшлі ажно 17 хлопчыкаў і дзяўчынак – такога ў Глыбачцы даўно не было! Давялося нават крыху паламаць галаву, як усіх размясціць. І ўсё ж гэта былі прыемныя клопаты!”.
Працягнуць эстафету сваіх папярэднікаў, стаўшы пераможцамі шматлікіх конкурсаў і алімпіяд, пажадаў вучням дырэктар Ільюшынскай СШ Аляксандр Мікалаевіч Азевіч. Святочнага настрою дадало школьнікам і педагогам ААТ “Ільюшынскі”, якое выдзеліла да Дня ведаў 6 тон зерня школе і 3 тоны дзіцячаму саду. За добрасумленную працу падчас летніх канікул кіраўніцтва гаспадаркі ўручыла многім хлопчыкам і дзяўчынкам грашовыя прэміі.
Ва ўсіх навучальных установах, як заўсёды, Дзень ведаў праходзіў парознаму, але ўсюды ён быў насычаны на радасныя ўсмешкі і шчырыя словы. Завяршыў жа ўрачыстыя лінейкі першы званок, які абвясціў аб надыходзе цікавых, часам цяжкіх, але такіх неабходных для вучняў будняў.
Кацярына КАВАЛЕЎСКАЯ.
