Традыцыйныя культуры
Звыш 10 тысяч гектараў неабходна ўбраць аграрыям раёна падчас жніва. Дзякуючы ААТ “Дземенец”, які сеяў азімы ячмень і яравую трыцікале, сёлета разнастайная відавая структура плошчаў, але стаўка робіцца на традыцыйныя культуры: азімае жыта – 2648 гектараў, азімую пшаніцу – 1233, яравы ячмень – 2791, яравую пшаніцу – 1042, азімую трыцікале – 678, авёс – 483. Яшчэ 1294 гектары займаюць зернебабовыя. Амаль чацвёртая частка ўсіх плошчаў належыць ААТ “Ільюшынскі”, дзе неабходна ўбраць 2400 гектараў. Вялікі зерневы клін і ў КУСГП “Вялікадолецкае” – 1863 гектары.
***
Пара спрыяльных дзянькоў – і ўжо можна казаць аб старце масавай уборкі зерневых. У панядзелак вільготнае паветра над падсыхаючымі палеткамі напоўніліся гулам камбайнаў ў розных гаспадарках раёна. Неабходна даражыць кожным сонечным днём. І зараз, калі збажына паспявае паступова, не дзеліцца ўраджай на свой і чужы, а тэхніка аператыўна накіроўваецца туды, дзе ў гэтым маецца патрэба.
ААТ “Дземенец” на старце жніва традыцыйна ў лідарах. Камбайны тут падрыхтавалі аднымі з першых яшчэ да ўборкі азімага ячменю, падчас якой абкаталі тэхніку, і на пачатку тыдня ўсе збожжаўборачныя агрэгаты пасля абеду выйшлі ў поле. Па словах дырэктара гаспадаркі Аляксандра Віктаравіча Шарыпенкі, азімае жыта за Ваўчом – не самы лепшы ўчастак. На маё пытанне аб ураджайнасці кіраўнік адказаў лаканічна: “Толькі першы бункер намалацілі, але на вока бачу, што не вельмі. Бачыш, каласы не сагнула, прама стаіць жыта! Значыць не налілося зерне…”
Стартавыя тоны выгружаў Мікалай Яловік, непадалёк працаваў КЗС1218 яго брата Аляксандра. Традыцыйна на жніве ў “Дземенцы” і браты Грачовы – Анатоль на камбайне, а Руслан на МАЗе. Але айчынных самазвалаў на ўскрайку поля налічыў аж тры – на дапамогу аграрыям прыйшлі вайскоўцы. З канца мінулага тыдня ва Ушачы прыбыла 29 аўтамашын зводнага аўтамабільнага ўзвода з розных часцей Узброеных Сілаў краіны.
– Я і да арміі паспеў папрацаваць вадзіцелем, – дзеліцца першымі ўражаннямі ад працы ў нашым раёне Аляксей Мялік, ураджэнец Івацэвіцкага раёна, радавы 85ай брыгады сувязі, што дыслацыруецца ў Баранавічах. – Хоць і не ў сельскагаспадарчай арганізацыі, але гэта не першая мая ўборачная – працаваў на зернетоку. Ужо 14 месяцаў адслужыў, а ў водпуску яшчэ не быў… Можа пасля дапамогі вашым аграрыям паспею схадзіць!
Замільгаў ліхтар аб запаўненні бункера над камбайнам і хлопец хуценька накіраваўся туды. Побач з ім у кабіне – прапаршчык Уладзімір Ус, бо служачым тэрміновай службы адным працаваць нельга. Яшчэ адзін самазвал, які камандзіраваны ў “Дземенец”, належыць воінскай часці з Навагрудка, а гаворка вадзіцеля, які, дарэчы, быў у цывільным адзенні, адразу выдае ўраджэнца заходніх рэгіёнаў:
– Я не ваеннаслужачы, хаця і працую ў арміі, – тлумачыць мужчына. – У складзе атрада разам з салдатамі тэрміновай службы, кантрактнікамі і прафесійнымі ваеннымі ёсць і грамадзянскія. Размясцілі нас пакуль на базе спартыўнай залы ля лясгаса. Харчаванне выдатнае, наведваем сталовую райспажыўтаварыства, паспелі ўжо і пасёлак крыху разгледзіць, нават назву вашай газеты ведаем!
Раз удзел у кампаніі прымаюць вайскоўцы – значыць, і сапраўды бітва за ўраджай. З гэтым, праўда, А.В.Шарыпенка не згодзен, кажа, “бітвы” засталіся ў дзевяностых, але пазмагацца за своечасовую ўборку без страт прыйдзецца”. У гэтай барацьбе дапамога вайскоўцаў вельмі дарэчы, тым больш, што працуюць яны бясплатна і на сваёй тэхніцы. Будуць аказваць паслугі і іншым сельгаспрадпрыемствам раёна.
Ад поля за Ваўчом да сховішча гаспадаркі “Дземенца” аўтамабілі накіроўваліся напрамую кароткім шляхам, таму і прастойвалі камбайны пэўны час у чаканні загрузкі. “У нас напачатку так заўсёды. Затое як на дубраўскі бок паедзем, і “плячо” стане вялікім – там ўжо салдацікам давядзецца папацець, каб камбайнеры не чакалі. Тады і паглядзім з якога яны цеста!” — усміхаўся загартаваны на папярэдніх уборачных Руслан Грачоў.
Не толькі салдаты, але і адзін аднаму дапамагаюць у гэтыя дні аграрыі. У панядзелак ільюшынскія камбайнеры накіраваліся на ўборку рапсу ў ААТ “Ушацкі райаграсэрвіс”. Армейскія аўтамабілі працавалі побач з мясцовымі механізатарамі ў КУСГП “Глыбачаны”, сваю пшаніцу ўбіралі вялікадолецкія камбайнеры, а іх калегі з ААТ “АграСелішча” пачалі ўборку жыта на палетках КУСГП “Арэхаўна”, дзе як і ў КУСГП “Кублічы” не паспелі падрыхтаваць уласныя камбайны. Але ў раёне абрана менавіта такая тактыка жніва: тэхніка не павінна прастойваць — убіраць, дапамагаючы адзін аднаму, ўсе спелыя ўчасткі
Дзмітрый РАМАНОЎСКІ.
