“Што за завод узводзіцца ў вас?” – цікавіліся камандзіраваныя ва Ушачы работнікі аблгаза. Прыйшлося спачатку ўдакладняць месца, а потым тлумачыць, што будуецца не прамысловае прадпрыемства, а “фабрыка здароўя”, якой павінен стаць новы фізкультурна-аздараўленчы комплекс “Юнацтва”.
Ушачане ўжо прывыклі да віду новага велічнага будынка, які міжволі прыцягвае ўвагу гасцей гарпасёлка і нават цяжка паверыць, што ўсяго чатыры гады таму на гэтым месцы была пустэча. Зараз жа ўсё часцей даводзіцца чуць пытанні аб тэрмінах здачы аб’екта. Работы на ім не спыняюцца, а генеральны падрадчык КУП “Полацксельбуд” задзейнічае на будоўлі шэраг сваіх даччыных арганізацый. На мінулым тыдні, калі наведаў комплекс, тут працавалі работнікі трох ПМК. Першымі сустрэў нашых будаўнікоў – брыгада Аляксандра Вітальевіча Касіча ўстанаўлівала бардзюры пешаходнай дарожкі, якую потым збіраліся выкладваць тратуарнай пліткай. Работы хапае і ўнутры будынка, але ж і аб’ёмы на добраўпарадкаванні вялікай тэрыторыі ўражваюць – толькі пліткі неабходна пакласці 3800 квадратных метраў!
На месцы будучага 25-метровага басейна з чатырма дарожкамі пакуль толькі катлаван. А вось памеры і выгляд спартыўнай залы, дзе тынкоўкай займаліся работнікі Шаркоўшчынскай ПМК-68, можна ўжо ацаніць, бо адна тарцовая сцяна была пафарбавана. Гатова і аснова пад трыбуну, якая змесціць звыш 200 гледачоў. Адсюль зручна будзе назіраць валейбольныя, баскетбольныя, мініфутбольныя, гандбольныя баталіі – універсальная зала адпавядае стандартам для правядзення матчаў па гульнявых відах спорту на самым высокім узроўні. Зона адпачынку, сауна, як і шэраг іншых памяшканняў таксама размесцяцца на першым паверсе.
А на другім, у будучай зале для шэйпінгу, вырываліся снапы іскраў зпад зварачных апаратаў. Тут манціравалі металаканструкцыі перагародак прадстаўнікі Глыбоцкай ПМК-48. Побач размесціцца і яшчэ адно памяшканне, якога ва Ушацкай дзіцяча-юнацкай спартыўнай школе чакаюць напэўна больш, чым басейн. У дзюдаістаў нарэшце з’явіцца спецыялізаваная зала барацьбы, якая будзе суседнічаць з дарожкамі для моднага зараз боўлінга. Сама сутнасць комплексу прадугледжвае аказанне наведвальнікам шэрагу паслуг. Зразумела, што адведзена месца і для усіх неабходных дапаможных памяшканняў – раздзявальняў, санвузлоў, душавых кабін, пакояў для трэнераў, захоўвання спартыўнага інвентару. У комплекс таксама ўвойдзе гасцініца для спартсменаў, якая дасць магчымасць прыняць цэлую каманду да 20 чалавек. Гэта яшчэ адзін несумненны плюс будоўлі, бо ўмовы, калі пад адным дахам размешчаны і залы для трэніровак, і месца пражывання, павінны прыцягнуць патэнцыяльных арандатараў – у комплексе вучэбнатрэніровачныя зборы можна будзе праводзіць нават камандам майстроў.
Пры ўсіх фінансавых цяжкасцях работы на комплексе не спыняюцца і аб’ект не ператварыўся ў даўгабуд. Гэта не можа не радаваць. У гэтым, як і ў факце самога будаўніцтва, безумоўная заслуга нашага дэпутата, старшыні Палаты прадстаўнікоў Нацыянальнага сходу Рэспублікі Беларусь Уладзіміра Паўлавіча Андрэйчанкі, які кожны год спрыяе, каб ушацкі ФАК застаўся ў рэспубліканскай праграме будаўніцтва. Фінансаванне праекта ажыццяўляецца за кошт рэспубліканскага і абласнога бюджэтаў. У будаўніцтва ўжо ўкладзена каля 70 мільярдаў рублёў, а работы на дадзены момант выкананы прыкладна на 65 працэнтаў. Падчас візітаў на Ушаччыну Уладзімір Паўлавіч заўсёды наведвае будоўлю, цікавіцца ходам работ, аказвае дапамогу ў вырашэнні бягучых пытанняў. Таму, калі наша “фабрыка здароўя” нарэшце расчыніць дзверы для наведвальнікаў, ён будзе самым чаканым сярод ганаровых гасцей.
Дзмітрый РАМАНОЎСКІ.
