Завітаўшы ўвечары на агарод – у прамым сэнсе схапілася за галаву. “Чорная ножка, ранні фітафтароз?” – скакалі думкі і выцягвалі з падкоркі вядомыя захворванні бульбы. Што магло за суткі так сапсаваць прыгожыя дружныя ўсходы, якія так радавалі ўчора, а сёння… Я абыходзіла ўчастак і то там, то тут, але пераважна ў ніжняй частцы ўчастка натыкалася на сухі пажаўцелы ці счарнелы бульбоўнік. Бачыла падобнае ўпершыню. І калі за першай дапамогай прыбегла да інтэрнэта, ён у верхніх радках выдаў такую простую прычыну: бульбу прыхапіў мароз.
Адыдзе! Супакойваюць вопытныя агароднікі. Ці так гэта? Што рабіць, калі агародніна сустрэлася з марозам. І як засцерагчыся, калі раптам зноў неспадзявана прыйдзе холад.
– Нашы дзеянні ў такіх сітуацыях залежаць ад таго, калі заўважылі падмярзанне, – аказвае кваліфікаваную дапамогу начальнік інспекцыі па насенняводстве, каранціне і ахове раслін Галіна Мікалаеўна Кашко. – У ноч з нядзелі на панядзелак у раёне сапраўды былі замаразкі. Нам вядомы факты падмярзання не толькі бульбы, але і фасолі, іншай агародніны. Калі б вы заўважылі няладнае з пасевамі раніцай, да таго, як сонейка паспела канчаткова прачнуцца, а на лістах яшчэ захаваўся іней, можна было б апырскаць падмерзлыя ўсходы вадой са шланга з распыляльнікам – гэта б зняла стрэс. Таксама добра пасля гэтага прыцяніць пасевы: на вялікіх участках гэтага не зробіш, а на градках магчыма з дапамогай паперы, кардону, фанеры.
Калі ж вы прапусцілі гэты час, то можна дапамагчы раслінам аднавіцца пасля невялікіх замаразкаў, апырснуўшы антыдэпрэсантамі. Напрыклад, прэпарат эпінэкстра дапамагае расліне мабілізаваць свае ўнутраныя рэсурсы і больш таго, выпрацоўвае імунітэт да перападу тэмператур. Апрацоўваюць лісты і галіны пашкоджаных раслін з усіх бакоў, праз 710 дзён працэдуру паўтараюць. У 5 літрах разводзяць адну ампулу, пажадана ваду падкісліць, размяшаўшы некалькі драбінак лімонкі, адну чайную лыжку воцату ці борнай кіслаты. Апырскваць трэба зранку ці познім вечарам.
Пасадкі бульбы можна вярнуць да жыцця, як мага раней падкарміўшы іх азотнымі ўгнаеннямі: нітрафоскай, аміячнай салетрай, карбамідам. Дозы павінны быць слабымі: паўтара кілаграма салетры дастаткова для апрацоўкі соткі.
Пад агародніну, якая пацярпела ад замаразку, можна ўнесці комплексныя ўгнаенні (10 грамаў на квадратны метр), якія стымулююць рост раслін.
І нарэшце, калі вы пачулі, што магчымы замаразкі, варта ўвечары паліць расліны: вільготная глеба эфектыўна аддае цяпло ноччу і такім чынам сагравае расліны.
Па словах Мікалая Мікалаевіча Кірпіча, член Рускага геаграфічнага таварыства, які вядзе назіранні за надвор’ем з 1966 года, ва Ушацкім раёне было два факты чэрвеньскіх замаразкаў: у другой дэкадзе месяца 1971 і 1982 гадоў. Прычым, падчас апошняга выпадку мароз быў не толькі на глебе, але і ў паветры і таксама пашкодзіў усходы бульбы.
Вольга КАРАЛЕНКА.
