Часовыя нязручнасці для больш камфортнага руху ў будучым чакаюць зараз аўтамабілістаў, маршрут якіх праходзіць па аўтадарозе Р116 Ушачы-Лепель. Прычынай таму з’яўляецца рамонт дарожнага палатна, які выконваюць рабочыя Ушацкай лінейнай дарожнай дыстанцыі ДЭУ № 37 г.Лепеля. Работы вядуцца на лясным участку шашы паміж Ліпаўцом і Вашкова. Палатно тут мае ўзрост пад 40 гадоў, вельмі зношанае і патрэба ў рамонце стаяла востра. Ямкі дарожныя рабочыя латаюць не асфальтам, бо ён мае нізкі паказчык фіксацыі са старымі слаямі, патрабуе дабаўлення бітуму і высокіх тэмператур – выкарыстоўваецца спецыяльная арганамінеральная сумесь, якая мае шэраг пераваг.
– Яна складаецца з бітуму, шчэбеню і прысадак, – расказвае аб тэхналогіі рамонту начальнік арганізацыі Пётр Пятровіч Кляшчонак. – Сумесь добра ўшчыльняецца і перад яе ўкладкай не патрэбна награваць асфальт.
Брыгада Андрэя Ізмайловіча на аўтадарогу Р116 выязджае не першы дзень. Праца ў асноўным ручная, але задзейнічана і некалькі адзінак тэхнікі. Адзін трактар падвозіць матэрыялы, другі ж неабходны для перамяшчэння рэцыклера – спецыяльнага механізма, дзе арганамінеральная сумесь даводзіцца да неабходнай тэмпературы. Каб не перакрываць рух, бакі дарогі рамантуюцца пачаргова, за дзень дарожнікі выконваюць работы на 20-30 квадратных метрах.
Дзмітрый РАМАНОЎСКІ.
