Так, напэўна толькі па назве чытачы ўявілі сабе мінулагодні творчы конкурс, што праводзілі Федэрацыя прафсаюзаў і Беларускае тэлебачанне, а таксама і нашых маладых спевакоў. У 2016 годзе конкурс паўторыцца, а яго ўдзельнікамі змогуць стаць… Менавіта пра гэта мы запыталіся ў старшыні райкама аб’яднання прафсаюзаў Беларусі Мікалая Іванавіча БУХАЛКІ.
– Мікалай Іванавіч, хто зможа стаць удзельнікам конкурсу?
– Літаральна любы чалавек, які валодае нейкімі творчымі накірункамі – можа спяваць, маляваць, рэзаць па дрэве… Адрозненне менавіта ў тым, што ў мінулым годзе маладыя людзі толькі спявалі, а цяпер можна праявіць здольнасці як у сцэнічнай творчасці (вакальным, харэаграфічным, тэатральным, інструментальным жанрах), так і ў выяўленчым і дэкаратыўнапрыкладным. Так што можна ўжо рыхтаваць мастацкія фотаздымкі, песні ці карціны.
– Абмежаванняў ва ўзросце няма?
– Не, прыняць удзел у конкурсе зможа любы член прафсаюза – прадстаўнікі працоўных калектываў без абмежавання па ўзросце. Прычым, у намінацыі дэкаратыўнапрыкладная творчасць – як індывідуальныя аўтары, так і аўтарскія групы, аднак без дапамогі спецыялістаў з профільнай адукацыяй. Можна падаваць не больш пяці экспанатаў.
А вось у намінацыі сцэнічнае мастацтва могуць удзельнічаць толькі творчыя групы ад 4 да 10 чалавек, прычым тут дапускаецца, што адзін з іх будзе з профільнай адукацыяй. Сцэнічны нумар павінен быць па працягласці не больш 7 хвілін. Вітаецца сінтэз сцэнічных жанраў, а ў масавых мерапрыемствах могуць удзельнічаць члены сям’і канкурсантаў.
Для ўдзелу ў конкурсе заяўку прафсаюзная арганізацыя падае на адрас раённага аб’яднання прафсаюзаў (Ленінская, 12) да 15 снежня.
Вольга КАРАЛЕНКА.
