Нядаўна машыннатрактарны парк ААТ “Ільюшынскі” папоўніўся двума новымі трактарамі. Праўда, несапраўднымі, а зробленымі са звычайнай саломы.
Традыцыя рабіць саламяныя фігуры існуе ўжо некалькі гадоў. У што толькі не пераўтвараліся рулоны саломы! Самымі распаўсюджанымі на пачатку былі вусені ды цягнікі. З кожным годам ля дарог па ўсёй краіне з’яўляліся ўсё новыя і новыя персанажы, усё больш фантазіі праяўлялі людзі, каб упрыгожыць наваколле. Сёлета на Лёзненшчыне нават праводзіцца конкурс на лепшую кампазіцыю з саломы сярод прадпрыемстваў і арганізацый.
Гэтай восенню вырашылі ўпрыгожыць свае палеткі каля дарог і ў “Ільюшынскім”, толькі замест прывычных казачных ці іншых персанажаў тут паставілі на мэце зрабіць штосьці больш блізкае да сельскагаспадарчай дзейнасці. Самы падыходзячы варыянт – трактар. Для вырабу работнікі гаспадаркі акрамя саломы выкарысталі плёнку і некаторыя іншыя атрыбуты, каб трактар быў больш падобны да сапраўднага. Спачатку з’явіўся магутны агрэгат з вялікім прычэпам на полі на ўездзе ў аграгарадок Ільюшына. Затым трактар з тых жа матэрыялаў, але іншай мадэлі і ўжо з намаляваным трактарыстам заняў пачэснае месца каля аўтадарогі ПолацкМінск непадалёк ад Старога Сяла. Па самай ажыўленай трасе раёна штодзень перамяшчаецца вялікая колькасць людзей. Машыны прыпыняюць свой рух, каб лепш разгледзець незвычайны трактар, а некаторыя нават спыняюцца, каб сфатаграфаваць яго.
Пакуль прыгожыя трактары радуюць вока ўсіх праязджаючых міма, задаволеныя сваім вырабам ільюшынцы ўжо задумваюцца, якую фігуру зробяць у наступным сезоне.
Вольга КАМАРКОВА.
