У першую вераснёўскую нядзелю мы традыцыйна віншуем з Днём работнікаў нафтавай, газавай і паліўнай прамысловасці ўшацкіх газавікоў, але ж ёсць у нашым раёне і іншыя працаўнікі, якія таксама адзначаюць названае прафесійнае свята: гэта работнікі аўтазаправачных станцый.
Зараз нават цяжка паверыць, што яшчэ ў сярэдзіне 80-х ушацкія аўтаўладальнікі, каб заправіць палівам бензабак, накіроўваліся ў Лепель ці Полацк. Першая АЗС на тэрыторыі раёна з’явілася ў Сарочыне ў 1987 годзе, а ў 1999м адкрылася аўтазапраўка на ўездзе ва Ушачы. Дзевяць жа год таму запраўляцца ў райцэнтры атрымалі магчымасць і тыя, хто ездзіць на газе. У цяперашні час на АЗС №34 ва Ушачах можна кругласутачна набыць бензін і дызельнае паліва, а заправіцца газам – з 7 раніцы да 20.00. АЗС №37 у Сарочыне абслугоўвае кліентаў з 7 да 19 гадзін. На аўтазапраўцы ва Ушачах за суткі рэалізоўваецца каля 12 метраў кубічных нафтапрадуктаў, пяць разоў на тыдні запасы паліва папаўняюцца аўтацыстэрнамі РУП “БеларуснафтаВіцебскаблнафтапрадукт”.
Трэба сказаць, што абласное прадпрыемства ставіць сваёй мэтай павышэнне якасці абслугоўвання насельніцтва, вядзе будаўніцтва сучасных комплексаў, дзе разам з запраўкамі размяшчаюцца магазіны, кафэ, аўтастаянкі, санітарныя блокі. Такія нядаўна адкрытыя комплексы ўжо працуюць на трасе ля Шуміліна, Бягомля, у Наваполацку – апошні, дарэчы, атрымаў першае месца па выніках рэспубліканскага конкурсу на лепшую АЗС. Разам з будаўніцтвам новых праводзіцца мадэрнізацыя і рэканструкцыя існуючых станцый: вось і на ўшацкай АЗС заканчваецца капітальны рамонт апошняга з шасці рэзервуараў для паліва. Сёлета абласное прадпрыемства адчувае фінансавыя цяжкасці, тым не менш вышуквае магчымасць працягваць распачатыя праекты: як вядома, беларускія дарогі лічацца візітоўкай нашай краіны, і аўтазаправачныя станцыі павінны адпавядаць гэтаму ўзроўню.
Еўрапейскім мусіць быць і сэрвіс на іх, а таму і патрабаванні да работнікаў – самыя высокія. Выпадковыя людзі тут не затрымліваюцца. Так, практычна ўсе 8 аператараў, якія пазменна абслугоўваюць кліентаў ва Ушачах і Сарочыне, маюць вялікі працоўны стаж на прадпрыемстве. Напрыклад, з самага адкрыцця АЗС у Сарочыне працуюць на ёй аператары Зоя Аркадзьеўна Курневіч і Ларыса Пятроўна Первянёнак – апошняя, дарэчы, атрымала сёлета да прафесійнага свята Ганаровую грамату РУП “БеларуснафтаВіцебскаблнафтапрадукт”. Шмат гадоў адпрацавала побач з калегамі і Валянціна Іванаўна Пугач. У любы час дня і ночы знаходзяць агульную мову з кліентамі аператары АЗС №34 Алена Вячаславаўна Чымпой, Алена Васільеўна Талмачова, Дзіна Віктараўна Рубанік, Іна Васільеўна Быкава і Святлана Фёдараўна Фядосава. Дарэчы, у абавязкі аператараў уваходзіць не толькі разлік за паліва, але і гандаль іншымі таварамі, якія можна набыць на запраўцы: гэта маторныя маслы, ахалоджваючыя і тармазныя вадкасці, аўташыны, фарбы і грунтоўкі, аўтакасметыка, а таксама напіткі, сродкі гігіены, іншы тавар для аўтамабіляў і іх вадзіцеляў. Тых жа, хто наведвае газавую запраўку, хутка і якасна абслугоўваюць аператары Аляксандр Уладзіміравіч Ільюшэнка, праца якога таксама сёлета адзначана Ганаровай граматай прадпрыемства, Генадзь Васільевіч Рубанік і Аляксандр Уладзіміравіч Кузняцоў. Комплексным абслугоўваннем АЗС займаюцца Аляксандр Расціслававіч Падгола і Валянціна Дзмітрыеўна Дрозд. Ну а каардынуе ўсю работу, адказвае за бяспеку працы і выконвае шэраг іншых неабходных абавязкаў майстар АЗС Дзмітрый Фёдаравіч Пацэйка.
Усіх названых спецыялістаў, якія, дарэчы, працуюць у шкодных умовах, хочацца павіншаваць з прафесійным святам і падзякаваць за поўныя бакі ў нашых машынах, за добры настрой, які яны дораць нам штодня якасным сэрвісам і цёплымі ўсмешкамі.
Наталля БАГДАНОВІЧ.
