Сярод многіх кветак, якія вырошчваю ля дома, адны з маіх любімых – цыніі. Цвітуць яны працяглы час – з пачатку лета да самых маразоў. Кветкі маюць мексіканскае паходжанне, а таму ўстойлівыя да спякоты: няблага перанеслі і сёлетнюю гарачыню, хоць, канечне, даводзілася іх паліваць. 
Але ж зараз клумбы ў маім палісадзе нібыта ахоплены полымем, бо цыніі вылучаюцца вельмі яркай афарбоўкай кветак. Вырошчваю я гэтую непатрабавальную расліну ўжо многа гадоў, восенню збіраю насенне, каб вясной зноў высадзіць расаду. Хацелася б бачыць гэтыя прыгожыя кветкі і на нашых гарадскіх клумбах, каб іх выгляд радаваў не толькі мяне і маіх суседзяў па вуліцы Горкага, а і ўсіх жыхароў райцэнтра – калі ў работнікаў УП ЖКГ узнікне жаданне, магу падзяліцца з імі і ўшацкімі кветкаводамі насеннем цыній.
Мая СМАЛЯК, г.п.Ушачы.
