Нягледзячы на тое, што Канстытуцыя Рэспублікі Беларусь гарантуе кожнаму грамадзяніну краіны бясплатнае медыцынскае абслугоўванне, сёння актыўна развіваюцца платныя паслугі. Як нам расказалі ва Ушацкай ЦРБ, з кожным годам у нашым раёне павялічваецца колькасць жадаючых паправіць здароўе менавіта на ўмовах аплаты, а кошт такіх паслуг застаецца стабільна невысокім.
Карыстаюцца нязменным попытам ва ўшачан многія фізіятэрапеўтычныя паслугі (электра-, святло- і тэрмалячэнне, інгаляцыйная і пнеўмакампрэсійная тэрапія, масаж традыцыйны і на спецыяльнай кушэтцы), а таксама стаматалагічныя (зубалячэнне, зубапратэзаванне) і гінекалагічныя. Ёсць сярод ушачан аматары лячэбнай фізкультуры на бегавой дарожцы, элептычным трэнажоры. Ну і куды ж без дыягностыкі? Заўсёды ў “фаворы” лабараторныя метады даследавання крыві – агульны і біяхімічны аналіз, на гармоны шчытападобнай залозы, на наяўнасць анкалагічных захворванняў прастаты і яечнікаў. Можна зрабіць таксама агульны аналіз мачы, даследаванне на ганарэю, сіфіліс (ананімна). Заўсёды мнагалюдна ля кабінета ультрагукавога даследавання, дзе правяраюць органы брушной поласці, мочапалавую сістэму, перыферычныя сасуды, шчытападобную і малочную залозы з лімфатычнымі вузламі, мяккія тканкі, мышцы і інш. Грамадзянам можа быць аказана ананімная наркалагічная дапамога – удакладніць інфармацыю можна непасрэдна ва ўрача-нарколага па нумары 2-03-44, а таксама дэрматавенералагічная. Ёсць у райбальніцы і такая паслуга, як транспарціроўка грамадзян у суправаджэнні медработніка. Атрымаць жа кансультацыю ўрача-спецыяліста можна не толькі ў спецыялізаванай установе, але і ў сябе дома.
Платныя медыцынскія паслугі – гэта карысны дадатак да бясплатных, якімі вы можаце скарыстацца ў любы час года, а фізіятэрапеўтычнае аддзяленне працуе без абеду да 19 гадзін. Сродкі ж, атрыманыя райбальніцай ад аказання пацыентам платных паслуг, ідуць на далейшае паляпшэнне і ўдасканаленне матэрыяльнай базы медыцынскіх устаноў Ушаччыны.
Па ўсіх пытаннях аказання платных медыцынскіх паслуг і іх кошце можна звяртацца па нумары 2-92-97.
КацярынаКАВАЛЕЎСКАЯ.
