Каля дваццаці ўдзельнікаў клуба “Адраджэнне” і супрацоўнікаў Дома рамёстваў працавала над стварэннем святочнай выставы, прымеркаванай да Дня жанчын. Праўда, адкрыта яна была спецыяльна загадзя – 4 сакавіка, каб наведвальнікі розных мерапрыемстваў раённага цэнтра культуры змаглі набыць эксклюзіўны падарунак як да 8 сакавіка, так і любых іншых свят, напрыклад, дзён нараджэння. Цікава, што 5 сакавіка, а менавіта ў гэты дзень праходзіла выніковае пасяджэнне работнікаў культуры, імяніны святкавалі бібліятэкар Людміла Клопава і супрацоўніца Дома рамёстваў Айгуль Смык. І калі апошняя – аўтар кампазіцый з саломкі, стужак, тканіны, то другая пажаноцку ацэньвала прыгажосць карцін з ружамі – толькі не маляванымі, а вырабленымі з тканіны. Тут жа былі саламяныя, драўляныя рэчы. І многамнога кветак з бісеру. Кошт работ вагаўся ад 10 да 450 тысяч.
Кіраўнік клуба “ Адраджэнне” Ала Васільеўна Кузусёнак не вельмі задаволена пакупніцкай актыўнасцю. Кажа, што найбольшай цікавасцю карысталіся работы з бісеру, заколкі для валасоў з каляровых стужак, драўлярае пано, вязаны шарф. Мабыць, не хапіла часу працы выставы.
Намнога больш ушачан проста парадавалі ся кампазіцыям. Ну а кіраўніка клуба радуе павелічэнне колькасці майстроў. Работнік музея, аўтар букетаў з бісеру Наталля Гардзіёнак прывяла ў клуб маладую майстрыху Наталлю Клачок. Да ўдзелу ў выставе на пацвярджэнне клубам звання народнага працуе зараз пенсіянерка Лідзія Мікалаеўна Хамічонак. Рознымі шляхамі прыходзяць яны да мастацтва, рознымі методыкамі валодаюць, розны матэрыял любяць. І менавіта гэтым цікавыя.
Вольга КАРАЛЕНКА
