Дзень абаронцаў Айчыны! Свята з далёкімі каранямі, якое старэйшае пакаленне адзначала яшчэ як дзень Чырвонай Арміі і ВаеннаМарскога флоту. Дзень, падчас якога віншуюць усіх прадстаўнікоў моцнай паловы чалавецтва, аднак успрымаецца яно ўсё ж як свята сапраўдных мужчын – служыўшых, ваяваўшых, абараняўшых Радзіму. І свята патрыятызму.
У зале раённага цэнтра культуры 23 лютага былі прадстаўнікі розных пакаленняў. І менавіта гэтым моцнае мерапрыемства. Малыя побач з бацькамі, дзядамі, прадзедамі. Так, шасцёра ветэранаў Вялікай Айчыннай, якія былі ў зале – гэта ваяваўшыя прадзеды той моладзі, якая дарыла абаронцам музычныя нумары.
Зусім нямнога збіраецца іх на свята. Зусім. На гэты раз прыехаў Дзям’ян Уладзіміравіч Крупеня з Глыбачкі, Міхаіл Сцяпанавіч Іваноў з Рагуцкіх, Віктар Восіпавіч Пашкевіч з Вашкова, Аляксей Максімавіч Алексяёнак, Кацярына Кузьмінічна Шасцярэнь, Кацярына Мікалаеўна Васілеўская з Ушач. Усім ім намеснік ваеннага камісара Ушацкага раёна Віталь Генадзьевіч Леснічэнка ўручыў юбілейныя медалі “70 год Перамогі ў Вялікай Айчыннай вайне 19411945 г.г.”
У гэты дзень ад старшыні раённага Савета дэпутатаў Вольгі Мікалаеўны Захарэнкі, як і ад літаральна ўсіх выступаўшых са сцэны, гучала многа не толькі віншаванняў ветэранам ды і ўсім мужчынам, але і наогул паралеляў з тым ваенным часам і напружаным сённяшнім. Неаднойчы прыгадвалася Украіна, і ў гэты час мая суседка ўціскалася ў крэсла і паўшэптам вымаўляла: “Ці адчуваем мы, у якой шчаслівай краіне жывём”.
Так. Нам вельмі пашчасціла, што яны, нашы ветэраны, адстаялі мір і выжылі, каб расказаць пра тое, як было, нашчадкам. Пашчасціла, што не хаваемся ў бомбасховішчах, што можам працаваць і святкаваць сімвалічныя для ўсёй краіны святы. І менавіта таму роля абаронцы, афіцэра паранейшаму мае гучны і высокі сэнс, а патрыятычнае выхаванне – прыярытэтнае як ніколі. Вольга Мікалаеўна Захарэнка звярнулася да ўсіх прысутных у зале з заклікам адгукнуцца на збор сродкаў, які будзе аб’яўлены на справу гонару ўшацкіх патомкаў – рэстаўрацыю мемарыяльнага комплексу “Прарыў” і музея імя У.Е.Лабанка. Ушачанам, канечне, як нікому трэба быць наперадзе па захаванні святых месцаў раёна, якія з’яўляюца знакавымі і для ўсёй Беларусі. Гэта справа не аднаго дня – як і працяг традыцыі бацькоў. А па традыцыі, як і кожнае 23 лютага, былі ўскладзены вянкі да помніка воінам і партызанам у скверы гарпасёлка. Толькі сёлета раённая дэлегацыя накіравалася на ўскладанне прама са сцэны РЦК.
Музычныя і танцавальныя нумары на гэты раз перамяжоўваліся з выступленнямі ўдзельнікаў маладзёжнага вакальнага конкурсу “Новыя імёны Беларусі”, аб’яўленага Федэрацыяй прафсаюзаў Беларусі пры падтрымцы Міністэрства культуры і нацыянальнай дзяржаўнай тэлерадыёкампаніі. Дзяніс Шарын, Вольга Пугачова, Вольга Косых, Валянціна Літвін, Марына Андзіна, Яўген Зуеў сталі ўдзельнікамі раённага этапу. Старшыня раённага аб’яднання прафсаюзаў Мікалай Іванавіч Бухалка і Вольга Мікалаеўна Захарэнка павіншавалі ўсіх удзельнікаў, уручылі дыпломы пераможцам, якімі журы прызнала Вольгу Пугачову, Вольгу Косых і Марыну Андзіну (на здымку). Дзяўчаты прымуць удзел у абласным этапе конкурсу.
Апошнюю ж песню “Белая Русь” зала спявала разам. А ветэраны падпявалі, змахваючы слёзы з вачэй.
Вольга КАРАЛЕНКА.
